Счетчик электроэнергии

Քաղաքացիների ահազանգը. հոսանքի թվերն իրական չեն

928
Ծանոթանալով հոկտեմբեր ամսին սպառած էլեկտրաէներգիայի վերաբերյալ հաշվիչների ցուցմունքներին` մարդիկ «շոկի մեջ են ընկնում»

ԵՐԵՎԱՆ, 18 նոյեմբերի — Sputnik. Ծանոթանալով հոկտեմբեր ամսին սպառած էլեկտրաէներգիայի վերաբերյալ հաշվիչների ցուցմունքներին` մարդիկ «շոկի մեջ են ընկնում», Sputnik լրատվական պորտալը հանրապետության տարբեր մարզերից ահազանգեր է ստանում այն մասին, որ թվերն աճում են երկրաչափական պրոգրեսիայով:

Արշակունյաց 39/9 հասցեի բնակիչները, առանց բացառության, դժգոհում են «նկարված» թվերից: Կարծում են, որ տեսուչը ինչ-որ մեքենայություններ է արել, հակառակ դեպքում նման տհաճ անակնկալ չէին ունենա:

Счет за электроэнергию за месяц
© Sputnik/ Асатур Есаянц
Բնակիչների սպառած էլեկտրաէներգիայի ցուցակները


«Եթե սեպտեմբերին մեր հոսանքի  ծախսը 22 հազար դրամ էր, ապա հոկտեմբերին այդ թիվը հասավ մոտ 29 հազարի: Սա այն դեպքում, երբ նույն քանակի էլէկտրաէներգիա ենք սպառել: Հիշեցնեմ նաև, որ հոկտեմբերին ոչ ոք բնակարան չի ջեռուցում, հետևաբար պատասխանատուներն այդ պատճառաբանությունը չեն կարող բերել»,- ասում է նշված հասցեի բնակչուհին:

Նույն խնդիրը նկատել են նաև Պարոնյան 7 հասցեում: Երկար են լռել, բայց հիմա կարծում են, որ միայն բարձրաձայնելու դեպքում հարցը լուծում կստանա:

Մենք զրուցեցինք նաև Կոտայքի մարզի Աբովյան քաղաքի 3-րդ շենքի բնակչուհու հետ: «Չեմ հասկանում, թե այդ ինչ թվաբանության արդյունքում են որոշել, որ իմ ընտանքիը պետք է հավելյալ գումար վճարի: Մենք մեր տանը ևս հաշվիչ ունենք, բայց այդ փաստն իմանալով հանդերձ` տեսուչն ավելի զգոն չդարձավ»,-վրդովված տեղեկացնում է Քրիստինեն:

Հայաստանի էլեկտրական ցանցերի մամուլի և հասարակայնության հետ կապերի դեպարտամենտի պետ Նատալյա Սարջանյանը հաղորդեց, որ կոնկրետ ահազանգի դեպքում ուսումնասիրում են իրավիճակը: Եթե տեսուչը խախտում է կատարում, ապա նրան վարչական պատասխանատվության են ենթարկում: Մեր այն հարցին, թե ասվածի ինչ օրինակներ է հիշում, Սարջանյանը դժվարացավ պատասխանել:

Счетчики электроэнергии
© Sputnik/ Асатур Есаянц
Էլեկտրաէներգիայի հաշվիչներ


«Դուք մեզ մասնավոր դեպքերի մասին տեղեկացրիք: Մեզ մնում է ուսումնասիրել դրանք, իսկ հետագա գործողությունների մասին կտեղեկանաք»,- հավաստիացրեց նա:

Sputnik լրատվական պորտալը կհետևի գործողությունների ընթացքին:

Գոհար Սարգսյան

928