ԵՐԵՎԱՆ, 3 նոյեմբերի – Sputnik. Տուլայի մոտակայքում կողաշրջված ավտոբուսի զոհերի թիվը հասել է 8-ի ևս 48-ը տուժել է։ Նրանք բոլորը ՀՀ քաղաքացիներ են։ ՃՏՊ–ն տեղի է ունեցել գիշերը «Դոն» դաշնային ավտոմայրուղու վրա։ Մեքենան, որն իրականացնում էր Մոսկվա–Երևան երթուղին, հարվածել է եզրապատնեշին և կողաշրջվել։ Քրեական գործ է հարուցվել։ Դեպքի վայրում քննչական խումբ է աշխատում։
Կոտրված պատուհաններ, ջարդուփշուր ողած սրահ, ցաքուցրիվ իրեր։ Դեքը տեղի է ունեցել գիշերվա երկուսին։ Մոսկվա–Երևան երթուղին իրականացնող ավտոբուսը հարվածել է եզրապատնեշին, անցել ևս 200 մետր և այնուհետև կողաշրջվել։ Ավտոբուսում գտնվում էր 59 մարդ, բոլորը Հայաստանի քաղաքացիներ են, ուղևորների մեջ երեխաներ չկան։ Զոհվել է 8 մարդ, ևս 48-ը վիրավորվել է։ Վարորդը ողջ է մնացել, այժմ նա գտնվում է շոկային վիճակում։
«Ներկա պահին վարորդին հարցաքննում են ոստիկանության աշխատակիցները` փորձելով պարզել այս ճանապարհատրանսպորտային պատահարի իրական պատճառները», – հայտնել է ՆԳՆՎ տարածքային մամուլի ծառայության ղեկավար Անդրեյ Յարցևը։
Դեպքի վայրում ողջ գիշեր աշխատել են ԱԻՆ փրկարարները և բժիշկների 13 բրիգադ։ Տուժածներին տրամադրվել է անհրաժեշտ բժշկական և հոգեբանական օգնություն։ Լուրջ վնասվածքներ ստացած անձանց օպերատիվ կերպով տեղափոխել են հիվանդանոց։
«Հիվանդանոցում գտնվում են ՃՏՊ 17 տուժածներ, 5-ը գտնվում են վերակենդանացման բաժանմունքում, 10-ը վնասվածքաբանական բաժանմունքում, 2 մարդ ֆիզիոբաժանմունքում։ Հինգ մարդ ստանում է ամբուլատոր բուժում։ Բոլոր նրանք, ովքեր գտնվում են վերակենդանացման բաժանմունքում ծանր վիճակում են, իրականացվում է հետազոտություն, բուժում է նշանակվել, կատարվում են բոլոր անհրաժեշտ միջոցառումները», – պատմել է Ուզլովսկի շրջանային հիվանդանոցի գլխավոր բժիշկ Նիկոլայ Ռուսակովը։
Ուղևորները պատմում են, որ ամեն ինչ շատ արագ է կատարվել, որ կարգին ոչինչ չեն հասցրել հասկանալ։ ՆԳՆ աշխատակիցները կատարվածի երկու վարկած են դիտարկում` ավտոբուսի տեխնիկական անսարքությունն ու այն, որ վարորդը կարող էր քնել ղեկին։ Այս պահի դրությամբ դեպքի վայրում բոլոր աշխատանքները գրեթե ավարտված են։
Ավտոբուսը քարշակի օգնությամբ անիվների վրա են դնում, այնուհետև հեռացվում դեպքի վայրից։ Այդ հատվածում երթևեկությունը գրեթե ամբողջությամբ վերականգնվել է։ քրեական գործ է հարուցվել «Ճանապարհային կանոնների խախտում և տրանսպորտային միջոցի շահագործում, որն անզգուշությամբ հանգեցրել է երկու կամ ավելի անձանց մահվան» հոդվածով։
Ինչպես հայտնում է ՀՀ ՏԿԱԻՆ-ը, տուժածներից 8 մարդ հանգրվանել է հարազատների տներում, ևս 12 մարդ տեղափոխվել է անվտանգ տարածք (տեղի կինոթատրոնի շենք): ՀՀ ՏԿԱԻՆ ճգնաժամային կառավարման ազգային կենտրոնից հեռախոսով կապ է հաստատվել նրանց հետ, և մեր հայրենակիցները փոխանցել են, որ իրենց հետ ամեն ինչ կարգին է:
ՀՀ ՏԿԱԻՆ ճգնաժամային կառավարման ազգային կենտրոնը պարբերական կապ է պահպանում ՌԴ ճգնաժամային կառավարման կենտրոնի և Տուլայի շրջանի ՃԿԿ-ի հետ, նաև աշխատում Ռուսաստանում ՀՀ փոխդեսպան Արթուր Մանասարյանի հետ: Փորձ է արվում կապվել Տուլայի շրջանի բժշկական կենտրոնների հետ, որտեղ գտնվում են պատահարից տուժած մեր հայրենակիցները: Աշխատանքներ են տարվում նաև զոհերի ինքնությունը պարզելու ուղղությամբ:
Նոյեմբերի 3-ին՝ տեղական ժամանակով ժամը 03.10-ին, տեղեկատվություն էր ստացվել, որ Տուլայի տարածաշրջանի Ուզլովայա քաղաքի մոտ Մոսկվայից Երևան եկող ավտոբուսը վթարի է ենթարկվել:
