Японская художница Мидзуэ Тагаки

Հայաստան - Ճապոնիա. հարաբերությունների նոր փուլ արվեստում

685
(Թարմացված է 18:00 21.10.2015)
«Էյբիք» հայ-ճապոնական կազմակերպությունը` համագործակցելով ճապոնական GalleryGinza 1 Chome պատկերասրահի հետ, արդեն տասը տարի Ճապոնիայում և Հայաստանում կազմակերպում է անհատական և կոլեկտիվ ցուցահանդեսներ

ԵՐԵՎԱՆ, 21 հոկտեմբերի — Sputnik. «Ավանդույթից արդիականություն» խորագրով հայ-ճապոնական ժամանակակից արվեստի ցուցահանդես կանցկացվի հոկտեմբերի 22-23-ը Երևանի Հովհ. Շարամբեյանի անվան ժողովրդական ստեղծագործության կենտրոնում, չորեքշաբթի լրագրողներին ասաց «Էյբիք» հայ-ճապոնական կազմակերպության ղեկավար Վարդիթեր Հարությունյանը:


«2006 թվականից համագործակցելով ճապոնական GaleriaGinzaIChome ցուցասրահի հետ, մասնավորապես, տնօրեն Մակի Միկիկոյի հետ, մենք ժամանակ առ ժամանակ ցուցահանդեսներ ենք կազմակերպում Հայաստանում և Ճապոնիայում: Այս տարի ցուցահանդեսը նվիրված կլինի Հայաստանում Ճապոնիայի դեսպանատան բացմանը, որը գործում է այս տարվա հունվարից», — նշեց Հարությունյանը:


Նրա խոսքով` Ճապոնիայում մարտին նմանատիպ ցուցահանդես է անցկացվել, որին մասնակցել են ինչպես հայ, այնպես էլ ճապոնացի արվեստագետներ:

«Վաղը` հոկտեմբերի 22-ին, Երևանի պատմության թանգարանում տեղի կունենա հայ-ճապոնական ժամանակակից արվեստի ցուցահանդես, իսկ Հովհաննես Շարամբեյանի անվան ժողովրդական ատեղծագործության կենտրոնում հոկտեմբերի 23-ին տեղի կունենա երկրորդ ցուցահանդեսի բացումը», — ասաց Հարությունյանը:

Մակի Մակիկոն իր հերթին նշեց, որ բոլոր արվեստագետներից, որոնք երբևէ ցուցահանդես են անցկացրել Տոկիոյում գտնվող իր ցուցասրահում, ընտրվել է 21 մասնակից:


«Ցուցահանդեսի յուրաքանչյուր մասնակից կներկայացնի չորս աշխատանք: Մենք ընտրում ենք այն ստեղծագործությունները, որոնք թույլ կտան հայ այցելուին ծանոթանալ ճապոնական մշակույթին, ավանդույթներին և ժամանակակից արվեստին», — նշեց Միկիկոն:


Հայաստանում ցուցահանդեսին երկրորդ անգամ մասնակցող Միձուե Տագակին իր հերթին նշեց, որ ցանկանում է հանդիսատեսին փոխանցել այն գույները, որոնք տեսանելի չեն մարդու համար:

«Այս անգամ ես կներկայացնեմ իմ «Շարժում» աշխատանքը: Խոսքը մոր արգանդում երեխայի շարժման մասին է: Երբ սաղմը սկսում է ձևավորվել, էներգիա է առաջանում: Հենց այդ էներգիան էլ շարժում է ծնում», — նշեց Տագակին, ով հիմնականում յուղաներկով է աշխատում:

Директор японского павильона Galeria Ginza I Chome Маки Микико
© Sputnik / Асатур Есаянц
GaleriaGinzaIChome ցուցասրահի տնօրեն Մակի Միկիկո


Նկարիչ Արա Հայթայանը նշեց, որ մեկ տարի առաջ ինքն ու իր գործընկերները` հայ և ճապոնացի արվեստագետները, որոշեցին միավորել ջանքերը, որպեսզի Հայաստանում ներկայացնեն ճապոնական ժամանակակից արվեստը, Ճապոնիայում էլ հայկականը` ավելի լայն ձևաչափով:

Քանդակագործ Աշոտ Հարությունյանն ավելացրեց, որ հայերն ու ճապոնացիները հետաքրքրված են միմյանց ժամանակակից և ավանդական արվեստով, ինչպես նաև երկու կողմերին հետաքրքրում է ժամանակակից եռաչափ արվեստը և այս կամ այն արվեստի գործի ստեղծման համար տարբեր նյութերի օգտագործումը:

Ինչպես ասված է Հայաստանի մշակույթի նախարարության կայքում, «Էյբիք» հայ-ճապոնական կազմակերպությունը, համագործակցելով ճապոնական GalleryGinza 1 Chome պատկերասրահի հետ, արդեն տասը տարի Ճապոնիայում և Հայաստանում կազմակերպում է անհատական և կոլեկտիվ ցուցահանդեսներ:

Ցուցահանդեսների նպատակը արվեստի հայ երկրպագուներին Ճապոնիայի ժամանակակից գեղագիտությանը, ինչպես նաև Ճապոնիայի հասարակությանը` հայկական արվեստին ծանոթացնելն է:

Ցուցահանդեսին իրենց աշխատանքները (գեղանկարչություն, քանդակ, կիրառական արվեստի նմուշներ) կներկայացնեն 21 ճապոնացի և 9 հայ արվեստագետներ: Ցուցահանդեսն անցկացվելու է հոկտեմբերի 23-30-ը:

685