Депутат НС Армении Заруи Постанджян на акции протеста против подорожания электроэнергии

ԱԱԾ–ն զգուշացնում է Զարուհի Փոստանջյանին

51
ԱԱԾ–ն նշում է, որ Զարուհի Փոստանջյանը գերազանցել է ինքն իրեն և փորձել է ոտնակոխ անել քաղաքական պայքարի թույլատրելիության իրավական սահմանը

ԵՐԵՎԱՆ, 22 սեպտեմբերի – Sputnik. ՀՀ ԱԱԾ–ն հայտարարություն է տարածել և նշել, որ «Ժառանգություն» խմբակցության պատգամավոր Զարուհի Փոստանջյանն անցել է քաղաքական պայքարի թույլատրելիության իրավական սահմանը։

Ինչպես նշված է ԱԱԾ–ի հայտարարության մեջ, սույն թվականի սեպտեմբերի 18-ին «Ժառանգություն» խմբակցության պատգամավոր Զարուհի Փոստանջյանը, օգտագործելով Ազգային ժողովի բարձր ամբիոնը, թույլ է տվել սադրիչ արտահայտություններ:

«Ժառանգություն» խմբակցության նորաթուխ ղեկավարի պաշտոնամուտի իր ելույթով  Զ. Փոստանջյանը փորձեց իր կարգավիճակի փոփոխությունն, այսպես ասած, շռնդալից դարձնել, սակայն, ակնհայտորեն գերազանցեց ինքն իրեն և փորձեց ոտնակոխ անել քաղաքական պայքարի թույլատրելիության իրավական սահմանը, որից այն կողմ անխուսափելիորեն պետք է վրա հասնի սեփական արտահայտությունների ու արարքների համար պատասխանատվությունը:

ԱԱԾ–ից նշում են, որ 21-րդ դարում «Բաստիլներ քանդող», ժամանակավոր կառավարություններ ձևավորող, իրենց հեղափոխական բառապաշարով հասարակությանն ակնհայտորեն հոգնեցրած և պետականության հզորացման գործում անվտանգության մարմինների դերը չհասկացող գործիչներին օգտակար կլիներ ժամանակ առ ժամանակ հաշվի նստել այն պարզ ճշմարտության հետ, որ ԱԱԾ-ն «КГБ» և «НКВД» չի և որ այստեղ ծառայել ու ծառայում են բազմաթիվ նվիրյալ հայորդիներ, ովքեր հակառակորդի ահագնացող թշնամական վարքագծի պայմաններում ամենօրյա ծանր աշխատանքով ապահովում են այդ թվում տիկին Փոստանջյանի անվտանգությունը:

Չցանկանալով ներքաշվել էմոցիոնալ և անբովանդակ «քննարկումների» մեջ՝ ՀՀ ազգային անվտանգության ծառայությունը միայն հիշեցնում է, որ «տապալում», «շենքերի քանդում» արտահայտությունները և նման բովանդակությամբ կոչերը ՀՀ քրեական օրենսգրքով նկարագրված հանցավոր արարքների բնութագրիչ հատկանիշներից են և այդպիսի գործողություններն ուղղակիորեն առնչվում են օրենսդրությամբ ազգային անվտանգության մարմինների առաջ դրված խնդիրներին:

«Ուստի ցանկացած նման կոչ, առավել ևս գործողություն կատարելու փորձ կկանխվի ՀՀ ազգային անվտանգության ծառայության տրամադրության տակ եղած բոլոր օրինական միջոցներով»,– նշված է հաղորդագրության մեջ:

51