Հունահռոմեական ըմբշամարտի աշխարհի կրկնակի չեմպիոն Արթուր Ալեքսանյանը Sputnik Արմենիա պորտալին տված հարցազրույցի ժամանակ պատմեց իր անձնական կյանքի, հիմնական նպատակների, իր կնոջ իդեալի և փոքրիկ թուլությունների մասին։
– Արթուր, ի՞նչ էիր զգում, երբ առաջին անգամ չեմպիոնի կոչմանն արժանացար, և աշխարհի առաջնության ո՞ր մեդալն է Քեզ համար ամենաարժեքավորը։
– Ես սկսել եմ սպորտով զբաղվել, իմ առջև հստակ նպատակներ դնելով, դրանցից մեկն էր` աշխարհի չեմպիոն դառնալը։ Ես շատ ուրախ էի, որ իմ քրտնաջան աշխատանքի շնորհիվ կարողացա հասնել իմ նպատակին։ Ինչ վերաբերում է նվաճած մեդալների կարևորությանը, ապա ցանկացած հաղթանակ ինձ համար շատ կարևոր և թանկ է, քանի որ այն մեծ աշխատանքի արդյունք է։
– Ինչպե՞ս են անցնում քո օրերը ելույթների նախօրեին։
– Մրցումներից առաջ ես միշտ գտնվում եմ հավաքներին։ Յուրաքանչյուր օր երկու անգամ մարզվում եմ հավաքականի և մարզիչների հետ։ Բնականաբար, այդ օրերին, մարզումների գործընթացը տարբերվում է սովորականից` այն ավելի լուրջ և կենտրոնացած է լինում։
– Իսկ կարելի՞ է իմանալ չեմպիոնի սննդակարգը, կա՞ն մթերքեր, որոնք անպայման մտնում են քո սննդակարգի մեջ, և օրական քանի՞ անգամ ես սնվում։
– Դե, իհարկե, պետք է ուտել այն մթերքները, որոնք մարզիկին շատ էներգիա են տալիս։ Ես օրական երեք անգամ եմ սնվում։ Սակայն ես մի փոքրիկ թուլություն ունեմ` չեմ կարողանում հրաժարվել քաղցրավենիքից և խմորեղենից։
– Աշխատում եմ ապագայի մասին չմտածել։ Ինչ վերաբերում է իմ ներկայիս մրցակիցներին, ապա այդ մասին ավելի լավ է դատեն մասնագետները, քանի որ նրանք ավելի լավ գիտեն։ Անձամբ ես կարծում եմ, որ բոլոր մարզիկներն ինձ արժանի մրցակիցներ են և անհրաժեշտ է առաջ գնալու համար շատ աշխատել։
– Դու սպորտում կուռք ունե՞ս։
– Կուռք չունեմ, սակայն նպատակներ ունեմ, որոնց ձգտում եմ։
– Եթե կարելի է մի անձնական հարց… Շատ աղջիկներ հետաքրքրված են քեզանով։ Ներկա պահին քո սիրտն ազա՞տ է։
– Այո (ժպտում է), իմ սիրտն ազատ է, և առայժմ, եթե անկեղծ լինեմ, այդ մասին չեմ մտածել, քանի որ առջևում Օլիմպիական խաղերն են, և իմ բոլոր մտքերը դրանով են զբաղված։
– Իսկ ո՞րն է կնոջ քո իդեալը, ու՞մ կցանկանայիր քո կողքին տեսնել։
– Գեղեցիկ և խելացի (ժպտում է)։
– Քո սիրած օծանելիքը։
— Chanel, Armani, Bvlgari
– Ավտոմեքենայի ո՞ր ապրանքանիշն ես նախընտրում։
– Mercedes-Benz և BMW. Ամենից շատ, իհարկե, Mercedes-Benz եմ սիրում։
– Երազանք և կյանքի հիմնական նպատակ ունե՞ս։
– Իմ գլխավոր նպատակը Օլիմպիական խաղերին ոսկի նվաճելն է։ Իմ կյանքում երեք նպատակ կար` Եվրոպայի չեմպիոնի տիտղոսին արժանանալը, աշխարհի չեմպիոն և օլիմպիական չեմպիոն դառնալը։ Կարելի է ասել, որ երեք հիմնական նպատակներից երկուսն իրականացել են, մնացել է մեկը` ամենակարևորը։
