Конституция

Քաղաքական վերլուծաբան. Սահմանադրական փոփոխությունների շուրջ քաղաքական դաշտում արդեն կա կոնսոլիդացիա

85
Ազգային ժողովի առանձին խմբակցությունների «պառակտումները», ըստ Վահագն Սարոյանի, պայմանավորված են քաղաքական ներքին խնդիրներով, այլ ոչ թե սահմանադրական բարեփոխումներով

ԵՐԵՎԱՆ, 18 սեպտեմբերի – Sputnik. Ցանկացած հարցի կամ առաջարկի «ոչ» ասելիս պետք է ներկայացնել դրա այլընտրանքային տարբերակը, միանգամից «ոչ» ասել և ոչինչ չառաջարկել փոխարենը՝ նախ հետաքրքիր չէ, և հետո բերում է քո «ոչ»-ի գաղափարի փլուզմանը, «Sputnik-Արմենիա» ռադիոկայանի հետ զրույցում ասաց  քաղաքական հարցերի վերլուծաբան Վահագն Սարոյանը՝ խոսելով սահմանադրական փոփոխությունների փաթեթի շուրջ ծավալվող քննարկումների մասին:

«Ներկա իրավիճակում, այսպես ասած, «ոչ»-ի ճամբարում տեսնում եմ միայն «ոչ» և «ոչինչ» արտահայտություններ: Երբ մարդիկ «ոչ»-ից բացի ոչինչ չեն անում, ոչ մի քննարկում չի ծավալվում, ապա այդ գործընթացը շղթայական ռեակցիայով տանում է դեպի առ ոչինչ», — ասել է բանախոսը:

«Սահմանադրական փոփոխությունների հանրաքվեին ընդառաջ՝ ի՞նչ հնարավոր զարգացումների կարելի է սպասել, կլինի՞ արդյոք կոնսոլիդացիա» հարցին ի պատաստխան վերլուծաբանը նկատում է՝ նախ պետք է հասկանալ, թե ինչ ենք հասկանում կոնսոլիդացիա ասելով:

«Լայն կոնսոլիդացիա ասելով հասկանո՞ւմ ենք 100 տոկոսանոց կողմ այս փոփոխություններին, թե՞ քաղաքական դաշտի գործող անձանց մեծամասնության լոյալ վերաբերմունքը  և, բնականաբար, սահմանադրական բարեփոխումներին «այո» ասելը: Եթե ընդհանուր դիտարկենք, ապա այսօրվա դրությամբ բոլորս էլ տեսնում ենք, որ կան կոնսոլիդացիոն գործընթացներ, ինչի արդյունքը նախագահի ընդունելություններ են, տարբեր ուժերի հետ քննարկումները և այլն: Թե ինչի կհանգեցնի այս սահմանադրական գործընթացները՝ ցույց կտան հետագա գործընթացները, իսկ քաղաքական դաշտում մենք արդեն ունենք կոնսոլիդացիա», — վստահեցնում է քաղաքական վերլուծաբանը:

Թե այս ամենի արդյունքում ինչպիսի փոփոխություններ կլինեն, ինչ առաջարկություններ կներառվեն փոփոխությունների փաթեթում՝ ժամանակը ցույց կտա: Իսկ ինչ վերաբերում է Ազգային ժողովի առանձին խմբակցությունների «պառակտումներին», ապա, ըստ  Վահագն Սարոյանի, դրանք պայմանավորված են քաղաքական ներքին խնդիրներով, այլ ոչ թե սահմանադրական բարեփոխումներով:

85