ԵՐԵՎԱՆ, 16 սեպտեմբերի – Sputnik. Ադրբեջանի և եվրոպական կառույցների, մասնավորապես՝ ԵԱՀԿ-ի հետ հարաբերությունները, կարելի է ասել, զրոյական մակարդակի վրա են, «Sputnik-Արմենիա» ռադիոկայանի հետ զրույցում նման դիտարկում արեց քաղաքական վերլուծաբան, փորձագետ Մանվել Ղումաշյանը:

Նա ընդգծեց, որ հասկանալի պատճառներով Ադրբեջանին դուր չի գալիս եվրոպական կառույցների ռեակցիան, մասնավորապես՝ Ադրբեջանում մարդու իրավունքների ոտնահարման, լրագրողների նկատմամբ դատավարությունների առումներով:

«Բայց մյուս կողմից էլ Եվրոպան, բնականաբար, չի ցանկանա մինչև վերջ խզել կապերը: Քննադատելով Ադրբեջանին՝ այն կաշխատի գոնե մի թույլ օղակ պահել», — նշել է նա:

Եվրոպայի խորհրդի խորհրդարանական վեհաժողովում «Բռնության աճը Լեռնային Ղարաբաղում և Ադրբեջանի մյուս գրավյալ տարածքներում» զեկույցի հեղինակ, բրիտանացի Ռոբերտ Ուոլթերը այցելել է Ադրբեջան: Ադրբեջանամետ գործչի այս այցը քաղաքագետը դիտարկում է հենց այդ համատեքստում:

«Կարծում եմ` այստեղ որևէ այլ բան փնտրել չի կարելի: Սա կարելի է դիտարկել որպես ժեստ Եվրոպայի կողմից, որ չենք ցանկանում վերջնականապես խզել հարաբերությունները, և ինչպես ընդունված էր ասել՝ գնդակն Ադրբեջանի դաշտում է», — մեկնաբանել է քաղաքական վերլուծաբանը:

Նրա կարծիքով` Եվրոպայի և Ադրբեջանի հարաբերությունները նման են ծնող-երեխա հարաբերություններին:

«Երբ երեխան չարություն է անում, ծնողը, բնականաբար, պատժում է, նախատում, բայց միաժամանակ կապը չի կտրում նրա հետ: Եվրոպան ասում է՝ իմ սկզբունքներից ելնելով՝ քննադատում եմ քեզ, որովհետև դու այս և այն չափանիշներին հակառակ գործողություններ ես անում, բայց վերջնականապես կորած չես ինձ համար, այդ իսկ պատճառով պահում եմ որոշակի նվազագույն հարաբերություններ», — պատկերավոր նկարագրել է Ղումաշյանը:

Փորձագետի կարծիքով՝ Ադրբեջանի և եվրոպական կառույցների միջև հարաբերություններում մենք պետք է դիտորդի դեր ունենանք:

«Հենց մեր շահերից ելնելով՝ մենք պետք է ընդհանրապես ռեակցիա չտանք: Մյուս կողմից էլ հասկանում ենք, որ Ադրբեջանի և միջազգային կառույցների միջև հարաբերությունների խզումը բերում է նաև Ադրբեջանի դիրքորոշման սրացմանը մեր նկատմամբ, որովհետև այդ  կառույցների հետ կապերը լրացուցիչ լծակներ են: Եվ պատահական չէ կապը սահմանային լարվածության և եվրոպական կառույցների հետ հարաբերությունների վատթարացման միջև: Դրանք փոխկապակցված են», — վստահեցնում է քաղաքական վերլուծաբանը:

ԵՐԵՎԱՆ, 3 մարտի -Sputnik. ՌԴ ժամանող Հայաստանի քաղաքացիները խնդիրներ են ունեցել «Ճամփորդիր առանց COVID-19-ի» հավելվածը ներբեռնելու ժամանակ, այժմ հարցը լուծվում է ու տեխնիկական ասպեկտները շուտով կհարթվեն։ ՌԻԱ Նովոստիին տված հարցազրույցում տեղեկությունը հայտնել է սփյուռքի հարցերով գլխավոր հանձնակատար Զարեհ Սինանյանը:

© Sputnik / Aram Nersesyan

Ինչպես կանխել արտագաղթը, կամ իրավիճակի պատասխանը կգտնեք «Զվարթնոցում»

«Ճամփորդիր առանց COVID-19-ի» բջջային հավելվածը, որը ստեղծվել է համավարակի պայմաններում ԵԱՏՄ ներսում ինտեգրացիոն միավորման երկրների քաղաքացիների ազատ ու անվտանգ տեղաշարժի համար, գործարկվել է փետրվարին: Մարտի 1-ին ՌԴ կառավարությունը երկարաձգել է դրանով Ռուսաստան մուտք գործելու ժամկետը մինչև ապրիլի 1-ը։   

«Բայց տեխնիկական խնդիրներ կան։ Օրինակ` ես խնդիր ունեի՝ այն չի «նստել» հեռախոսիս վրա, ստիպված էի հենց այդ հավելվածի համար ուրիշ հեռախոս ճարել։ Հիմնականում խնդիրները Android օգտագործողների մոտ են: Մեր շատ հայրենակիցներ, որոնք համավարակի պատճառով չէին կարող մեկ տարվա ընթացքում մուտք գործել Ռուսաստան, հիմա ուզում են գալ, բայց նրանց մոտ նման խնդիրներ են առաջանում։ Բայց ինձ ասացին, որ դրանք ժամանակավոր տեխնիկական խնդիրներ են, ու ես վստահ եմ, որ դրանք շուտով կշտկվեն», - ասել է Սինանյանը։

«Զվարթնոցում» իրարանցում է. ովքեր և ինչ նպատակով են մեկնում Ռուսաստան. տեսանյութ

Նա ավելացրել է, որ հավելվածի գործարկումից հետո առաջին մի քանի օրերին շատերին կանգնեցրել են դեռ Երևանից մեկնելիս։

«Բայց հիմա իրավիճակը հարթվում է․․․Դրանք տեխնիկական խնդիրներ են», - ավելացել է սփյուռքի հարցերով գլխավոր հանձնակատարը։

Հիշեցնենք, որ հավելվածը գործարկվել է փետրվարի 1-ից։ Հայաստանի քաղաքացիներն իրավունք են ստացել Ռուսաստան մեկնել կորոնավիրուսային վարակի բացասական թեստի առկայության դեպքում: Սակայն ոմանք սկզբում բախվել են հավելվածի աշխատանքի խափանման հետ կապված մի շարք խնդիրների։ Արդյունքում նրանց արտաքսել են։

Թեստի պատասխանը համակարգը չի ճանաչել. «Զվարթնոցից» ՌԴ մեկնողները փաստի առաջ են կանգնել