ԵՐԵՎԱՆ, 15 սեպտեմբերի – Sputnik. Ադրբեջանի և Արևմուտքի հարաբերությունների սրացման մեկնարկը 2013 թվականի Ադրբեջանի նախագահի ընտրություններից հետո էր, որն ավելի ու ավելի սրվելով այսօր հասել է այս մակարդակին: Ինչպես «Sputnik-Արմենիա» ռադիոկայանի հետ զրույցում նշել է Ադրբեջանի հարցերով փորձագետ, քաղաքական գիտությունների թեկնածու Անժելա Էլիբեգովան, բացի այդ, 2013 թվականից ի վեր պաշտոնական Բաքվի արտաքին առաջնահերթության մեջ տեսանելի է կայուն ռուսամետ քաղաքականությունը:
Խորհրդարանի ընտրությունների նախաշեմին կանգնած Ադրբեջանում այսօր բավական լարված իրավիճակ է: Բանախոսն ընդգծում է, որ մեկ ու կես ամիս է մնացել քվեարկության օրվան, սակայն մինչ օրս իշխող կուսակցությունը չի ներկայացրել իր ցուցակը: «Շատ պատգամավորներ, որոնք տարիներ շարունակ եղել են խորհրդարանում, այսօր, կարծես թե, շանսեր չունեն, և սրա հետ կապված ներքին կոնֆլիկտը բավական սուր է: Խոսակցություններ կան, որ այս անգամ Ադրբեջանի իշխանությունները գուցե գնան նոր սցենարով և փորձեն թույլ տան խորհրդարան անցնել քիչ թե շատ թվացյալ ընդդիմադիրներին»,-ասել է ադրբեջանագետը:
Ադրբեջանում նախընտրական վիճակը դեռևս վիզուալ թեժ չէ, բայց ինչպես նկատում է բանախոսը, եթե մի փոքր ավելի խորքային ենք նայում, ապա պարզ է դառնում, որ այդ երկրում ընթանում են շատ բարդ պրոցեսներ: «Իրական ընդդիմությունն առհասարակ հրաժարվել է մասնակցել ընտրություններին՝ պաշտոնապես հայտարարելով դրա մասին: Այսօրվա դրությամբ կա ևս մեկ հետաքրքիր իրավիճակ. երիտասարդ կազմակերպությունների ներկայացուցիչներ սկսում են միավորվել ինչ-որ դաշինքներում, հանդիպում են օտարերկրյա դեսպանությունների ներկայացուցիչների հետ»,-նշել է նա:
Ինչ վերաբերում է Եվրախորհրդարանի ընդունած բանաձևին, ապա քվեարկությանը նախորդած քննարկումներին առցանց ռեժիմով հետևած Էլիբեգովան մի հետաքրքիր դիտարկում է արել: Մասնավորապես, եվրախորհրդարանականները բոլոր հարցերը, դատապարտումները բավական արագ կերպով են քվեարկել, մինչդեռ Ադրբեջանի հարցում ընթացել է բավական թեժ քննարկում: «Նույնիսկ որոշ պատգամավորներ, պրոադրբեջանական կառույցների ներկայացուցիչներ առաջարկում էին առհասարակ չքվեարկել, և թեման չբարձրացնել, բայց երկար և թեժ քննարկումներից հետո քվեարկությունը կայացավ, և բանաձևն ընդունվեց ձայների գերակշիռ մասով»,-ընդգծել է քաղաքագետը:
Քննարկումներում ամենահետաքրքիրը, ըստ Էլիբեգովայի, ոչ թե մարդու իրավունքների հարցերը լուծելու կոչերն էին, այլ այն սպառնալիքները, որոնք առաջին անգամ հնչեցին ադրբեջանցի պաշտոնյաների հանդեպ պատժամիջոցներ կիրառելու մասին: «Այս ամենը բավական զայրացրեց պաշտոնական Բաքվին: Գումարվեց խորհրդարանի արտահերթ նիստ, որի ընթացքում հնչեցին աբսուրդ հայտարարություններ, Եվրամիությանը դատապարտեցին կոռուպցիայի համար, խոսեցին սիրիացի փախստականների մասին, այն մասին թե ինչպես է Ադրբեջանն այդ հարցը հրաշալիորեն լուծել: Բավական զավեշտալի պատկեր էր, և այդ նիստի վերաբերյալ համացանցում արդեն հայտնվել են ծաղրանկարներ»,-ասել է Անժելա Էլիբեգովան:
Ադրբեջանագետ. խորհրդարանի ընտրությունների նախաշեմին Ադրբեջանում բավական լարված իրավիճակ է
© SputnikАнжела Элибегова
© Sputnik
Բաժանորդագրվել
Այս անգամ Ադրբեջանի իշխանությունները գուցե գնան նոր սցենարով և փորձեն թույլ տան խորհրդարան անցնել քիչ թե շատ թվացյալ ընդդիմադիրներին