Города мира. Ереван

Երևանյան 9-րդ միջազգային երաժշտական փառատոնը մեկնարկել է

182
IX միջազգային երաժշտական փառատոնը կտևի մինչև հոկտեմբերի 28–ը։ Փառատոնին կմասնակցեն շուրջ 30 կատարողներ և երաժշտական խմբեր Հայաստանից, Ռուսաստանի, Նորվեգիայից, ԱՄՆ–ից, Մեծ Բրիտանիայից, Դանիայից, Իռլանդիայից, Գերմանիայից, Ճապոնիայից, Ֆրանսիայից, Իտալիայից

ԵՐԵՎԱՆ, 11 սեպտեմբերի– Sputnik.  Նախօրեին Երևանում մեկնարկել է IX միջազգային երաժշտական փառատոնը։

Փառատոնի բացման համերգը վստահաբար կարելի է աննախադեպ համարել։ Համերգի մենակատարը աշխարհահռչակ ջութակահար Վադիմ Ռեպինն էր։ Փայլուն ելույթ ունեցավ փառատոնի «մեղավորը»` Ազգային ֆիլհարմոնիկ նվագախումբը, որի 90–ամյակին էր նվիրված այդ միջոցառումը։

Նվագախումբը ելույթ է ունեցել գեղարվեստական ղեկավար և գլխավոր դիրիժոր Էդուարդ Թոփչյանի ղեկավարությամբ։ Հանդիսատեսը համերգի ավարտից հետո այնքան է բեմ կանչել երաժիշտներին, որ ծրագրով նախատեսված Բրուխի «Կոնցերտ ջութակի համար» և Մալերի «Սիմֆոնիա N1։Տիտան» ստեղծագործություններից բացի, երևանյան ունկնդրին ուրախացրել է նաև Չայկովսկու ստեղծագործության կատարմամբ։

Վադիմ Ռեպինը խորհրդային և ռուս ջութակահար է, երաժշտական կարիերան սկսել է հինգ տարեկանում։ Նա խոստովանել է, որ դա պատահական է տեղի ունեցել, քանի որ երբ մոր հետ գնացել է երաժշտական դպրոց, այլ գործիքներն արդեն զբաղված են եղել։ Արդեն 11 տարեկանում Ռեպինը դարձել է Լյուբլինում Վենյավսկու անվան ջութակի միջազգային մրցույթի դափնեկիր (առաջին մրցանակ)։

1989թ.–ին Ռեպինը դարձել է Բրյուսելում Եղիսաբեթ թագուհու անվան հեղինակավոր մրցույթի հաղթող։ 2010թ.–ին ջութակահարը պարգևատրվել է Ֆրանսիայի Victorie d'Honneur հեղինակավոր երաժշտական մրցանակով, ինչպես Chevalier de l'Ordre des Arts et Lettres շքանշանով։ Այն ջութակը, որով նվագում է Ռեպինը, ստեղծել է ջութակի վարպետ Գվարներին 1743թ.–ին։

IX միջազգային երաժշտական փառատոնը կտևի մինչև հոկտեմբերի 28–ը։ Փառատոնին կմասնակցեն շուրջ 30 կատարողներ և երաժշտական համույթներ Հայաստանից, Ռուսաստանից, Նորվեգիայից, ԱՄՆ–ից, Մեծ Բրիտանիայից, Դանիայից, Իռլանդիայից, Ճապոնիայից, Ֆրանսիայից, Իտալիայից։

Փառատոնի մասնակիցների շարքում են ալտահար Քիմ Քաշքաշյանն ԱՄՆ–ից, թավջութակահար Ալեքսանդր Չաուշյանը Մեծ Բրիտանիայից, ջութակահար Անուշ Նիկողոսյանը Հայաստանից, դաշնակահար Բարի Դուգլասն Իռլանդիայից, Բորոդինի անվան քառյակը։

Կհնչեն Մոցարտի, Բեթհովենի, Բրամսի, Շուբերտի, Շնիտկեի ստեղծագործությունները, ինչպես նաև կլինեն մի քանի երևանյան պրեմիերաներ։

Փառատոնն անցկացվում է Հայաստանի առաջին տիկին Ռիտա Սարգսյանի բարձր հովանու ներքո մշակույթի նախարարության աջակցությամբ։ Մշակույթի նախարար Հասմիկ Պողոսյանը ներկա է եղել փառատոնի բացմանը։

182