Следственный комитет Армении

ԱԱԽ–ի աշխատակցի ինքնասպանության փորձի առթիվ ՔԿ–ն քրեական գործ է հարուցել

558
(Թարմացված է 20:38 08.09.2015)
Կատարվում է նախաքննություն: Միջոցներ են ձեռնարկվում դեպքի բազմակողմանի, լրիվ և օբյեկտիվ հետազոտումն ապահովելու ուղղությամբ

ԵՐԵՎԱՆ, 8 սեպտեմբերի– Sputnik. ՀՀ քննչական կոմիտեի Երևան քաղաքի Կենտրոն և Նորք-Մարաշ վարչական շրջանների քննչական բաժնում հարուցվել է քրեական գործ՝ 32-ամյա Լյուդվիգ Հովհաննիսյանի ինքնասպանության փորձ կատարելու դեպքի առթիվ։

Ինչպես գրում են հայկական ԶԼՄ–ները, ԱԱԽ–ի պետական օբյեկտների պահպանման վարչության աշխատող Լյուդվիգ Հովհաննիսյանն իր գլխին էր կրակել իրեն ամրակցված հաշվեցուցակային «Մակարով» տեսակի ատրճանակից։

2015թ.–ի սեպտեմբերի 7-ին ժամը 09:55-ի սահմաններում Հերացու անվան թիվ 1 համալսարանական հիվանդանոցից տեղեկություն էր ստացվել, որ Երևան քաղաքի Մելիք Ադամյան փողոցից՝ Կառավարության շենքի մոտից, աջ հոնքային շրջանի հրազենային վնասվածքով իրենց մոտ է տեղափոխվել 1983թ.–ին ծնված Լ.Հովհաննիսյանը:

Նկատի ունենալով, որ նյութերում առկա են ՀՀ քրեական օրենսգրքով նախատեսված հանցագործության հատկանիշներ՝ դեպքի առթիվ  ՀՀ քննչական կոմիտեի Երևան քաղաքի Կենտրոն և Նորք-Մարաշ վարչական շրջանների քննչական բաժնում հարուցվել է քրեական գործ՝ ՀՀ քրեական օրենսգրքի 110-րդ հոդվածի 1-ին մասի հատկանիշներով (Սպառնալիքի, դաժան վերաբերմունքի կամ անձնական արժանապատվությունը պարբերաբար նվաստացնելու ճանապարհով անձին անուղղակի դիտավորությամբ կամ անզգուշությամբ ինքնասպանության կամ ինքնասպանության փորձի հասցնելը):

Կատարվում է նախաքննություն: Միջոցներ են ձեռնարկվում դեպքի բազմակողմանի, լրիվ և օբյեկտիվ հետազոտումն ապահովելու ուղղությամբ:

558