Футбол. Тренировка сборной Армении, Генрих Мхитарян

Հենրիխ Մխիթարյանը հավատում է, որ հայկական հավաքականը կհաղթի դանիացիների հետ խաղում

96
(Թարմացված է 13:04 07.09.2015)
Հայաստանի հավաքականի առաջատար ֆուտբոլիստ Հենրիխ Մխիթարյանը հայտարարել է, որ Հայաստանի համար Դանիայի պես ուժեղ թիմերի հետ խաղալը նորություն չէ։ «Մենք հակառակորդին պետք է մեր խաղը թելադրենք»,– ասել է նա։

ԵՐԵՎԱՆ, 7 սեպտեմբերի – Sputnik. Հայաստանի հավաքականի և Դորտմունդի «Բորուսիայի» կիսապաշտպան Հենրիխ Մխիթարյանը հավատում է, որ սեպտեմբերի 7–ին Երևանում նախատեսված Հայաստան–Դանիա հանդիպումը դրական ավարտ կունենա հայկական հավաքականի համար։


«Ավելի լավ խաղ եմ ակնկալում, քան Սերբիայի հետ խաղն էր։ Հավատում եմ, որ արդյունքը Հայաստանի հավաքականի համար դրական կլինի։ Հակառակորդը շատ ուժեղ է, բայց մեզ համար նորություն չէ նման թիմերի հետ խաղալը։ Մենք հակառակորդին պետք է մեր խաղը թելադրենք»,– ասել է Մխիթարյանն uefa.com–ին տված հարցազրույցում։

Նրա խոսքով` անձամբ նրա համար հավաքականում միակ մոտիվացումը հաղթանակն է։ «Երբ մենք հաղթում ենք, ապա բոլոր հայերի դեմքին ժպիտ է հայտնվում, փողոցներում երաժշտություն է հնչում, մարդիկ մեր հաջողությունը տոնում են որպես սեփական հաղթանակ։ Դրանից լավ էլ ի՞նչ կարող է լինել։ Հենց այդ ժպիտներն են ինձ համար ամենամեծ մոտիվացումը»,– նշել է Մխիթարյանը։

Անդրադառնալով սերբերի հետ խաղում դաշտում ունեցած իր դիրքին (հենակետային կիսապաշտպան)` նա ընդգծել է, որ իրեն ավելի լավ է զգում «հետ քաշված հարձակվողի» դիրքում, բայց դա որոշում է մարզիչը, որն ընտրության հնարավորություն չունի` ելնելով կազմի առկա խնդիրներից։ Հիշեցնենք, որ Հայաստան–Սերբիա խաղն ավարտվել էր 0։2 հաշվով։

Կիսապաշտպանի խոսքով` Եվրո–2016–ի ընտրական խաղերում հայկական հավաքականի անհաջողությունների պատճառներից մեկն այն է, որ երկրում  ֆուտբոլի զարգացման մակարդակը ցածր է։

«Ուժեղ թիմ ունենալու համար պետք է մանկապատանեկան լավ կազմակերպված ֆուտբոլ ունենալ։ Ցանկացած տուն պետք է կառուցել հիմքի վրա, իսկ ֆուտբոլի հիմքը մանկապատանեկան ֆուտբոլն է, որի զարգացումը մեզ մոտ թերանում է։ Բացի այդ, պետք է ուժեղ լինի Հայաստանի առաջնությունը, որը նոր անուններ, նոր ֆուտբոլիստներ կբացահայտի։ Ներքին առաջնությունն այդքան էլ բարձր մակարդակում չէ»,– ասել է Մխիթարյանը։

Հայաստանի հավաքականը սերբերի հետ կիսում է խմբի վերջին տեղը (Սերբիան որակազրկվել էր 3 միավորով)` հինգ խաղերից հետո հավաքելով մեկ միավոր։ Տասներկու միավորով առաջատար է Պորտուգալիայի հավաքականը։ Այնուհետև դանիացիներն ու ալբանացիներն են (11 միավոր)։

96