Арпине Ованнисян

Հայաստանի արդարադատության նախարարն առաջին անգամ կին կլինի

800
(Թարմացված է 17:57 04.09.2015)
Թեկնածությունն արդեն ներկայացվել է նախագահին, և շուտով պաշտոնապես կհայտարարվի նրա նշանակման մասին, ասաց խորհրդարանի խոսնակ Գալուստ Սահակյանը

ԵՐԵՎԱՆ, 4 սեպտեմբերի – Sputnik. ՀՀ արդարադատության հաջորդ նախարարը կլինի պատգամավոր, Հայաստանի Հանրապետական կուսակցության անդամ Արփինե Հովհաննիսյանը։

Այս մասին ուրբաթ լրագրողներին հայտնեց ՀՀ ԱԺ խոսնակ Գալուստ Սահակյանը` ընդգծելով, որ Արփինե Հովհաննիսյանը միակն էր, ում թեկնածությունը նախօրեին քննարկել է Հայաստանի Հանրապետական կուսակցության գործադիր մարմինը։

«Թեկնածությունն արդեն ներկայացվել է նախագահին, և շուտով արդեն պաշտոնապես կհայտարարվի նրա նշանակման մասին», – ասաց Սահակյանը։

Հայաստանի նախագահը հուլիսի 14-ին արդարադատության նախկին նախարար Հովհաննես Մանուկյանին ազատել էր զբաղեցրած պաշտոնից։ Հայկական ԶԼՄ–ներն արդեն տևական ժամանակ է` գրում էին, որ այդ պաշտոնը զբաղեցնելու է ԱԺ պատգամավոր, իրավաբանական գիտությունների թեկնածու Արփինե Հովհաննիսյանը։

Այսօր ԱԺ–ում Սահմանադրական բարեփոխումների նախագծի քննարկումների ժամանակ Հովհաննիսյանն ինչպես միշտ գերազանց տեսք ուներ։ Նրբագեղ դասական սև–սպիտակ համեստ զգեստով նա ընդունում էր գործընկերների շնորհավորանքները, այնուհետև զբաղեցրեց իր տեղն ու մասնակցեց քննարկումներին։

Նոր նախարարն այս տարի 32 տարեկան կդառնա, նա իրավաբանական գիտությունների թեկնածու է և դեռևս ոչ այդքան երկար կարիերայի ընթացքում հասցրել է աշխատել արդարադատության նախարարության աշխատակազմի դատաիրավական բարեփոխումների վարչության քրեակատարողական ծառայության բարեփոխումների բաժնում որպես առաջատար մասնագետ, զուգահեռ դասավանդել է ԵՊՀ–ի իրավաբանական ֆակուլտետի քաղաքացիական իրավունքի ամբիոնում։

Նա նաև զբաղեցրել է ՀՀ նախագահի աշխատակազմի ղեկավարի օգնականի և Հայաստանի ԱԺ–ի  խոսնակի խորհրդականի պաշտոնները։ 2012 թվականի մայիսի 6-ից Հայաստանի Հանրապետական կուսակցությունից համամասնական ընտրակարգով ընտրվել է որպես ԱԺ պատգամավոր։

800