Ամառը Հայաստանում. հրդեհները շատ էին, խեղդված մարդիկ` քիչ

ԵՐԵՎԱՆ, 2 սեպտեմբերի – Sputnik. ՀՀ տարածքային կառավարման և արտակարգ իրավիճակների նախարարության փրկարարական ուժերի վարչության պետ, փոխգնդապետ Արսեն Արշակյանն ամփոփել է 2015 թվականի ամառային սեզոնը և ներկայացրել ինը ամիսների ընթացքում գրանցված արտակարգ պատահարների վիճակագրությունը։

Մարդկային գործոն + շոգ

Ինչպես չորեքշաբթի Sputnik Արմենիա միջազգային մամուլի կենտրոնում հայտնեց Արշակյանը, օդի բավականին բարձր ջերմաստիճանի պատճառով երկրում շատացել են հրդեհի բռնկման դեպքերը, հատկապես` անտառային տարածքներում։

«2014 թվականի համեմատ,  2015 թվականին հրդեհների քանակն արդեն աճել է 86,4%–ով, և գրանցվել է 5237 հրդեհ, որոնցից 3810–ը` անտառային տարածքներում, ինչը 2.9 անգամ գերազանցում է 2014 թվականի նույն ցուցանիշը։ Հրդեհներից տուժել է 8541 հա կանաչ տարածություն», – ասաց Արշակյանը։

Նա նշեց, որ սովորաբար հրդեհների պատճառը մարդկային գործոնն է` չմարած խարույկ, չհավքված աղբ և այլն, իսկ շոգը միայն նպաստում է կրակի տարածմանը։

Արշակյանի խոսքով` ամռանը, միայն մեկ օրում, երբ օդի ջերմաստիճանը բարձրացավ մինչև 43-44 աստիճան, 190 հրդեհ գրանցվեց, և բոլոր այդ հրդեհները արագ մեկուսացվեցին և մարվեցին։

«Այսօր մենք ունենք համապատասխան սարքավորումներ հրդեհները մարելու համար, իսկ հրդեհային կայանները գտնվում են հնարավոր հրդեհավտանգ տեղերից 9-11 րոպե հեռավորության վրա։ Խնդիրը շարունակում է դժվար լուծելի մնալ միայն բարձրլեռնային և դժվարամատչելի շրջաններում, որտեղ ԱԻՆ–ն արդեն տեղադրում է հատուկ հենակետեր և արագ արձագանքման կայաններ», – ասաց Արշակյանը։

Նա նաև նշեց, որ մոտակա օրերին հրդեհավտանգ դեպքերը կկրճատվեն։

«Մոտակա օրերին ջերմաստիճանը 2-3 աստիճանով կբարձրանա, ինչը, սակայն, լուրջ վտանգ չի ներկայացնում հրդեհների առաջացման տեսանկյունից», – ասաց Արշակյանը։

Ջրի հետ կատակ չեն անում

Ինչ վերաբերում է ջրի հետ կապված միջադեպերին, ապա, ըստ փոխգնդապետի, այս տարի կրճատվել են մահվան դեպքերը, սակայն ավելացել են հատուկ սարքավորումներ պահանջող դեպքերը։

«Այս տարի Հայաստանում խեղդվել է վեց մարդ, որոնցից երկուսը` Սևանում, ընդ որում նրանցից մեկը` ոչ լողափային սեզոնի ժամանակ։ Ապրիլին այդ անձը շրջվել էր ոչ սթափ վիճակում ձկնորսություն անելիս։ Փրկարար ծառայությունն ահազանգը բավականին ուշ էր ստացել, այդ պատճառով մինչ օրս նրա մարմինը չեն գտել», – ասաց Արշակյանը` ավելացնելով, որ Սևանում գրանցված երկրորդ դեպքը նույնպես կապված է ոգելից խմիչքի հետ։

Մնացած չորս դեպքերը, նրա խոսքով, գրանցվել են լողալու համար չնախատեսված ջրամբարներում և գետերում։

Նրա խոսքով` զգալի ավելացել են այն դեպքերը, երբ մարդիկ իրենց ավտոմեքենաները կայանել են ափին շատ մոտ և մնացել ջրի ու ավազի մեջ։ Նրանց փրկելու համար գործադրվել է հատուկ տեխնիկա։