«Ереванское лето» попрощалось, но обещало вернуться

Հայաստանյան ամառվա կախարդիչ գույները

626
(Թարմացված է 12:04 01.09.2015)
Անի Լիպարիտյան
Օգոստոսի 31–ը ոչ միայն ամառվա վերջին օրն է, այլ նաև` «Երևանյան ամառ-2015» ծրագրի հրաժեշտի օրը

ԵՐԵՎԱՆ, 1 սեպտեմբերի — Sputnik. Հայաստանի մայրաքաղաքի բնակիչներն ու հյուրերը նախօրեին աներևակայելի շուքով ու ուրախությամբ հրաժեշտ տվեցին ամռանը։ Օգոստոսի 31–ին ոչ միայն ամռան վերջին օրն էր, այլ նաև` քաղաքապետարանի կազմակերպած «Երևանյան ամառ 2015» եռամսյա ծրագրի ավարտը։

«Երևանյան ամառը» հրաժեշտ տվեց, բայց խոստացավ վերադառնալ

«Ցտեսություն, ամառ» կարգախոսով միջոցառումը կազմակերպվել էր Երևանի սրտում` Կարապի լճի մոտ։ Միջոցառմանը ներկա էր Երևանի քաղաքապետ Տարոն Մարգարյանը։

Տոնի մասնակիցները երեկոն անցկացրին դիրիժոր Արմեն Հյուսնունցի գլխավորած պետական ջազ նվագախմբի մեղեդիների, ինչպես նաև Արամոյի, MARBEY–ի (Մարինա Հակոբյան), Ռադիկ Գաբրիելյանի և ուրիշների երգերի ներքո։

Հունիս


«Երևանյան ամառ» եռամսյա ծրագրի շրջանակում կազմակերպվել են ամենատարբեր թեմաներով միջոցառումներ։ Մասնավորապես, հունիսին քաղաքապետարանը մեծ ուշադրություն է դարձրել մանկական ժամանցային ծրագրերին` կազմակերպելով հետաքրքիր և ուրախ տոներ մայրաքաղաքի փոքրիկ բնակիչների համար։

«Երևանը փոքրիկների համար» միջոցառումը, որն անցկացվել էր Երեխաների պաշտպանության օրվա կապակցությամբ, իսկական տոն էր դարձել ոչ միայն մանուկների, այլ նաև մեծահասակների համար։ Կարևոր իրադարձություն էր այն, որ Երևանի կենդանաբանական այգին հիմնանորոգումից հետո կրկին դռներն էր բացել Երևանի բնակիչների և հյուրերի համար։

Հունիսին նաև անցկացվեցին «Երևանյան մշակույթի բաց դաս», «Իմ պատմական հայրենիքը», «Հայտնի մարդիկ` հայ լուսանկարիչների աչքերով», «Համեղ և բուրումնավետ Երևան», «Երևանյան բարդ» և մի շարք այլ միջոցառումներ։

Հուլիս


Ամռան երկրորդ ամիսը նույնպես լի էր գույներով և անակնկալներով։ Քաղաքապետարանը մայրաքաղաքի բնակիչներին և հյուրերին կրկին ուրախացրեց միջոցառումներով` «Խոսող խաղալիք», «Ընթերցող Երևան», Վարդավառ, Ձմերուկի փառատոն, «Շախմատային Երևան», «Պարում է Երևանը», «Կինոյի երեկո Երևանում»։

Օգոստոս


Ամռան վերջին ամիսը, թերևս, ամենահետաքրքիրն էր «Երևանյան ամառ» ծրագրի շրջանակում անցկացված միջոցառումների տեսանկյունից։ Նախևառաջ, Հյուսիսային պողոտայում կայացավ հայկական տարազների Yerevan TarazFest առաջին փառատոնը։ Դա աներևակայելի գեղեցիկ շոու էր, որը ցնցեց բոլոր ներկաներին. կազմակերպիչներին և մասնակիցներին հաջողվել էր ստեղծել հայկական կոլորիտի և ոգու անկրկնելի մթնոլորտը։ Երգեցին և պարեցին «Ակունք» ազգագրական խմբի մասնակիցները, իսկ մոդելները ցուցադրեցին դիզայներ–մոդելավորող Արամ Նիկոլյանի և «Տերյան» մշակութային կենտրոնի հագուստները։

Ոչ պակաս հետաքրքիր միջոցառում էր նաև Գարեջրի ավանդական փառատոնը։Հայկական «Օքթոբերֆեստը» գրավիչ է հսկայական թվով մարդկանց համար։ Նրանք հավաքվում են ընկերների կամ ընտանիքի հետ, գարեջրի և ավանդական նախուտեստների ուղեկցությամբ երաժշտություն են լսում, բաց երկնքի տակ դրված հարմարավետ սեղանների շուրջ շփվում են միմյանց հետ։

Օգոստոսը կհիշվի նաև «Երիտասարդ Երևան», «Երևանը ջազ է լսում» և այլ միջոցառումներով։

Իսկ եզրափակիչ համերգը նշանավորեց «Երևանյան ամառ» եռամսյա ծրագրի փակումը։ Այն կազմակերպել էր Երևանի քաղաքապետարանը և հատկապես հետաքրքիր էր մայրաքաղաքի օտարերկրացի հյուրերի համար։

Անհամբերությամբ սպասում ենք հաջորդ, ոչ պակաս գունեղ երևանյան ամռանը։

626