Ջորկայեֆը կմասնակցի Երևանում անցկացվող վազքի կիսամարաթոնին

ԵՐԵՎԱՆ, 17 օգոստոսի– Spuntik. Ֆրանսահայ ֆուտբոլիստ Յուրի Ջորկայեֆը կմասնակցի «RunArm 2015» վազքի միջազգային կիսամարաթոնին, որը  Հայաստանում կանցկացվի առաջին անգամ, հաղորդում է RunArm–ի մամուլի ծառայությունը։

Ջորկայեֆը 1998թ.–ին աշխարհի չեմպիոն է դարձել Ֆրանսիայի հավաքականի կազմում, 2000թ.–ին նա Եվրոպայի չեմպիոն է դարձել։

Ինչպես հայտարարել է ֆուտբոլիստը, այդ մարզական միջոցառմանը մասնակցելու հրավերը հիանալի առիթ է հայրենիքում գտնվելու և Երևանով հիանալու համար։

Երևանի կիսամարաթոնը կազմակերպել է RunArm կազմակերպությունը Հայաստանի աթլետիկայի ֆեդերացիայի նախագահ Ռոբերտ Էմմիյանի ղեկավարությամբ, Հայաստանի սպորտի և երիտասարդության հարցերի նախարարության, Երևանի քաղաքապետարանի, Հայաստանի ազգային օլիմպիական կոմիտեի հովանու ներքո։

«Ես ուրախ եմ, որ Ռոբերտ Էմմիյանը հանդես է եկել նման նախաձեռնությամբ և Երևանում առաջին անգամ միջազգային կիսամարաթոն կանցկացվի։ Ողջ աշխարհում պարբերաբար անցկացվում են նման մարաթոններ և կիսամարաթոններ։ Ես կցանկանայի, որ այն ամենամյա դառնա թե՛ երևանցիների, թե՛ հայ ժողովրդի համար, քանի որ վազքն առողջ կենսակերպի անբաժանելի մասնիկ է»,– նշել է նա։
Ֆուտբոլիստը հայտարարել է, որ մեծ ոգևորությամբ ընդունել է հրավերը և եղբոր` Դենիս Ջորկայեֆի հետ, ով ֆրանսիական Դեսին քաղաքի մշակութային, սպորտային և միջազգային կապերի գծով փոխքաղաքապետ է, մտադիր է կանգնել կիսամարաթոնի մասնակիցների հետ առաջին շարքերում։

Ջորկայեֆը կոչ է արել բոլոր հայերին միանալ այդ նախաձեռնությանը։

«RunArm 2015» կիսամարաթոնը մեկնարկելու է Հանրապետության հրապարակից և ներառելու է 4 վազքարշավ` կիսամարաթոն (21,097 կմ), փոխանցումավազք (2 x 10,550 կմ), 5 կմ վազք, 2,5 կմ վազք 12–ից 15 տարեկան դպրոցականների համար:

Վազքի միջազգային կիսամարաթոնի մասնակցության գրանցումը կսկսվի օգոստոսի 10–ին։ Բոլոր մասնակիցները կստանան մարզահագուստ և մեդալներ, իսկ հաղթողները կարժանանան դրամական պարգևների։