ԵՐԵՎԱՆ, 11 հուլիսի–Sputnik. Հայաստանի համար, անշուշտ, շատ կարևոր է տրանսպորտային ենթակառուցվածքի դիվերսիֆիկացումը: Դա այն հարցերից է, որը կարող է հետաքրքրել նաև այլ դերակատարների, որոնք ներգրավված են տարածաշրջանային ինտեգրացիոն գործընթացներում: «Sputnik-Արմենիա» ռադիոկայանի հետ զրույցում այս մասին ասել է ԱՊՀ երկրների ինտիտուտի հայաստանյան մասնաճյուղի տնօրեն, քաղաքագետ Ալեքսանդր Մարկարովը՝ անդրադառնալով ՀՀ նախագահի Ուֆայում ունեցած ելույթին:
Իրան-Հայաստան երկաթգծի կառուցումը կարևոր դեր կարող է ունենալ ինտեգրացիոն գործընթացներում և այդ նախագծի շուրջ էլ, ինչպես նշում է քաղաքագետը, եղել է հանդիպումների շարք՝ նախագծում տարբեր մասնակիցների ներգրավման նպատակով:
«Երկաթգծի կառուցումը, բնականաբար, բարդ տեխնիկական խնդիր է, որը երկար ժամանակ չէր ստանում իր լուծումը և մինչև հիմա գտնվում է նախագծի շրջանակում: Նախագահի արած առաջարկը, ըստ էության, ուղղված է շահագրգիռ կողմերին՝ նախագծում ներգրավելու նպատակով: Ժամանակը ցույց կտա, թե արդյոք այն տեխնիկական լուծումները, որոնք առաջարկվել են, կհետաքրքրեն շահագրգիռ կողմերին»,-նշել է նա:
Մարկարովն ընդգծում է, որ հիմնական հարցն այն է, թե ովքեր կարող են շահագրգռված լինել այս նախագծի իրականացման հարցում: Մասնավորապես՝ խոսքն Իրանի մասին է, չնայած նրան, որ իրանական կողմը հայտնել է իր պատրաստակամությունը: Ըստ փորձագետի՝ ծրագրի իրականացման համար տարբեր ձևաչափեր կան, բայց հարցն այն է, թե իրանական կողմն ինչ միջոցներ է պատրաստ ներդնել: Բնականաբար, այստեղ նաև հարց է ծագում՝ կապված հայկական կողմի երկաթգծի կառուցման շինարարության հետ, որը մեծ ներդրումներ է պահանջում:
Եթե նախագահին հաջողվի ԲՌԻԿՍ անդամ երկրների ուշադրությունը սևեռել նաև Հայաստանի տնտեսության վրա, ապա ի՞նչ ազդեցություն կարող է ունենալ Հայաստանի տնտեսական, տարածաշրջանային նաև աշխարհաքաղաքական զարգացումների վրա: Ի պատասխան, փորձագետը նշեց, որ Հայաստանի տնտեսության մեջ Ռուսաստանն արդեն հանդես է գալիս որպես հիմնական ներդրող:
«Թեպետ, հարկ է ավելացնել, որ բացի Ռուսաստանից, անհրաժեշտ է ստեղծել բարենպաստ ներդրումային պայմաններ այլ երկրների համար ևս»,-ասել է քաղաքագետն՝ ընդգծելով, որ Հայաստանն այսօր ԲՐԻԿՍ-ի երկրների, մասնավորապես, Հնդկաստանի, Չինաստանի հետ ունի որոշակի հարաբերություններ: Ըստ նրա՝ առաջին հերթին անհրաժեշտ է ուշադրություն դարձնել հենց այս երկրներին, որոնք պոտենցիալ ներդրողներ են Հայաստանի տնտեսության մեջ, այդ թվում՝ խոշոր նախագծերի: Ինչ վերաբերում է Բրազիլիային և Հարավային Աֆրիկային, ապա դրանք քիչ ավելի հեռու են և ավելի քիչ տնտեսական հետաքրքրություն ունեն տարածաշրջանում:
Փորձագետ.Անհրաժեշտ է ստեղծել բարենպաստ ներդրումային պայմաններ ԲՌԻԿՍ երկրների համար
© АРКА
Բաժանորդագրվել
Հայաստանի տրանսպորտային ենթակառուցվածքի դիվերսիֆիկացումը կարող է հետաքրքրել նաև տարածաշրջանային ինտեգրացիոն գործընթացներում ներգրավված այլ դերակատարների
