«Մշակութային վերածնունդ» հիմնադրամը ստեղծել է Հայկական մշակույթի գանձարան

ԵՐԵՎԱՆ, հուլիսի 10– Sputnik. «Մշակութային վերածնունդ» հիմնադրամը ստեղծել է կայք, որի նպատակն է իսկական հայկական երաժշտության վերաստեղծումը, հայտարարեց «Հայկական ազգային երաժշտական գանձարան» նախագծի պրոդյուսեր Արմեն Մարտիրոսյանը։

«Հիմնադրամի արդի խնդիրը հայկական երաժշտության գանձարանի ստեղծումն է։ Ներկա պահին «Մշակութային վերածնունդ» հիմնադրամի ջանքերով գտնվել, վերականգնվել, գրանցվել և թվայնացվել են ավելի քան 600 ստեղծագործություններ, որոնք աստիճանաբար ներբեռնվում են www.armenianmusic.am կայքում»,– ուրբաթ մամուլի ասուլիսում ասաց Մարտիրոսյանը։

Նրա խոսքով` կայքի ստեղծումը երկու նպատակ ունի։ Առաջինը` վերադարձնել հայ ժողովրդին իր սեփականությունը, քանի որ այդ երաժշտական հիշողությունը ջնջվել է, ինչպես նաև հանրաճանաչ դարձնել ազգային երաժշտության ուղղությունը։ Դրա համար կայքում յուրաքանչյուր երգ ներբեռնվում է նկարչի նկարով, որը ստեղծվել է դրա ազդեցության տակ։

«Կայքի ստեղծման երկրորդ նպատակը հիմնադրամի կողմից այդ երգերի հեղինակային իրավունքների ամրագրումն է։ Թեև դա ժողովրդական երաժշտություն է և դրա իրավունքն ունեն բոլորը, ֆիլմերում և այլ ուրիշ նախագծերում այդ թրեքերն օգտագործելիս անհրաժեշտ է մեր թույլտվությունը։ Այդ նպատակով յուրաքանչյուր ստեղծագործություն ունի «անձնագիր», որի մեջ կան բոլոր անհրաժեշտ տվյալները»,– ասաց Մարտիրոսյանը։

«Մշակութային վերածնունդ» հիմնադրամի տնօրեն և «Հայկական ազգային երաժշտական գանձարան» նախագծի համակարգող ղեկավար Մարինա Սուլթանյանը, իր հերթին, նշեց, որ նախագիծն ուղղված է ավանդույթների և հոգևոր արժեքների պահպանմանը։

«Հենց գաղափարը ծագել է երկու տարի առաջ։ Որոշվել է հիմնական ուշադրությունը դարձնել երաժշտությանը, քանի որ հենց դա է ամենից շատ ազդում մարդու հուզական աշխարհի վրա և միավորում ողջ աշխարհի հայերին»,– ասաց Սուլթանյանը։

Գլխավոր երաժշտական խմբագիր և խորհրդատու Արթուր Շահնազարյանը ներկայացրեց աշխատանքները, որոնք կատարվել են հիմնադրամի գործունեության մեկուկես տարվա ընթացքում։

«Հրատարակվել է Կոմիտասի 100 երգերի յուրահատուկ ժողովածու, որը պատրաստ է եղել դեռ 1903թ.–ին, բայց այդպես էլ չի հրատարակվել։ «Մեծ կոմպոզիտորի կարծիքով` հենց այդ երգերն են ներկայացնում հայկական երաժշտությունը։ Հրատարակվել են նաև «Ժամագիրքը», Եկմալյանի «Պատարագը»,– ասաց Շահնազարյանը։