Генеральный директор российского антикризисного расчетно-товарного центра Герман Стерлигов

Անհրաժեշտ է ծանոթանալ Գերման Ստերլիգովի ոչ միանշանակ կերպարին

403
Հայաստանում Գերման Ստերլիգովի մասին քչերը գիտեն, հետևապես՝ հանրությանը պետք է ծանոթացնել այդ մարդու կենսագրությանը, գործունեությանը: Մարդիկ պետք է ծանոթ լինեն նրա կերպարին, այլ ոչ թե կարծիք կազմեն Հայաստանի և Արցախի մասին արված հայտարարություններով:

ԵՐԵՎԱՆ, 9 հուլիսի – Sputnik. Հայաստանում Գերման Ստերլիգովի մասին քչերը գիտեն, հետևապես՝ հանրությանը պետք է ծանոթացնել այդ մարդու կենսագրությանը, գործունեությանը: Մարդիկ պետք է ծանոթ լինեն նրա կերպարին, այլ ոչ թե կարծիք կազմեն Հայաստանի և Արցախի մասին արված հայտարարություններով: 

«Sputnik-Արմենիա» ռադիոկայանի հետ զրույցում ասել է տեղեկատատվական անվտանգության փորձագետ Սամվել Մարտիրոսյանը՝ անդրադառնալով ռուս մեծահարուստ Ստերլիգովի Արցախ կատարած այցին: Մարտիրոսյանը Ստերլիգովին ոչ միանշանակ կերպար է համարում և ընդգծում, որ պետք չէ վստահ լինել, որ նա ծրագրում  է մեծ ներդրումներ անել Արցախում:

«Ինձ թվում է՝ նա փորձում է Արցախն օգտագործել որպես ժամանակավոր ապաստան՝ իր հարցերը  Ռուսաստանում լուծելու համար, որովհետև հայտնի է իր կապերը ռուս ազգայնական ծայրահեղականների հետ, որոնք մեղադրվում են մի շարք սպանությունների համար: Հիմա վկայություններ են հայտնվել, որ այդ խմբերը պարապել  և պատրաստվել են Ստրելիգովի տարածքներում, միգուցե  նաև ֆինանսավորվել են:  Այնպես որ, պետք չէ միանշանակ ընդունել»,-ընդգծել է նա:

Սամվել Մարտիրոսյանը կարծում է, որ այդ ամենի մասին պետք է իմանալ, քանի որ Հայաստանում շատեր չգիտեն նրա մասին և բավական ոգևորությամբ են ընդունել նրան:

«Միայն գիտեն, որ մի քանի ամիս առաջ եղել է Հայաստանում և հակաթուրքական ու պրոհայկական բավական կոշտ հայտարարություններ է արել: Բացի դրանից, այն, որ նա հարուստ է, կարող է սխալ տպավորություն ստեղծվի, որ ինչ-որ բարեգործ  է եկել: Պետք է նաև մի նրբություն էլ հաշվի առնել՝ այդ մարդը կոնֆլիկտներ ունի ռուս ուղղափառ եկեղեցու հետ և կարող է Արցախի տարածքն օգտագործել նաև հայտարարությունների համար»,-նախազգուշացնում է փորձագետը:

Այնուհանդերձ, Սամվել Մարտիրոսյանը չի բացառում նաև, որ Ստերլիգովը կարող է իսկապես ցանկանում է ներդրում կատարել, հետևաբար՝ «պետք է փորձել այդ ռիսկային պահերը կառավարելի դարձնել և դրական արդյունք ստանալ նրա այցից»:

Բանախոսը չի կարծում, թե Ստերլիգովի արարքը կարող է սադրանք լինել՝ հաշվի առնելով հայ-ադրբեջանական լարված հարաբերությունները: Մարտիրոսյանի խոսքով՝ Ստերլիգովը եզակի կերպար է, նրա քաղաքական և կրոնական հարաբերությունները, գործունեությունն էպատաժային են: «Նա ինքը սադրանք է, բայց ոչ ուղղորդված, այլ ուղղակի այդպիսին է»,-ասել է նա:

Հաշվի առնելով այն հանգամանքը, որ Ստերլիգովը կարող է լուրջ խնդիրներ ունենալ Ռուսաստանի օրենքների հետ, Արցախի իշխանությունը պետք է առավելագույն հեռավորություն պահի նրանից:

Սրան զուգահեռ, փորձագետը հավելում է, որ մյուս կողմից էլ պետք է թույլ տալ նրան հանգիստ ապրել և աշխատել:  «Պետք է ցույց տալ, որ Արցախը մի երկիր է, որտեղ մարդիկ կարող են ազատ գալ, բիզնես հիմնել, բայց մյուս կողմից, եթե նրան չափից ավելի պաշտոնական ընդունելություն ցուցաբերեն, ապա կարող է տպավորություն ստեղծվել, թե Արցախը «մոխրագույն տարածք» է, որտեղ օրենքի հետ խնդիր ունեցողները կարող են գալ: Իսկ դա լավագույնը չէ Արցախի իմիջի համար»,-նկատել է բանախոսը:

Սամվել Մարտիրոսյանը չի բացառում, որ Ադրբեջանը Ստերլիգովի այցը կարող է օգտագործել քարոզչական նպատակներով: Միաժամանակ նկատում է, որ այն չի կարող դա լրջորեն օգտագործել:

«Նրանք մի քիչ բալանսից ընկել են, քանի որ չեն հասկանում, թե ինչ անել: Մեր համար պլյուսը և մինուսն այն է, որ նա կարող է դիմել իռացիոնալ քայլերի, շատ դժվար է նրան դատել տրամաբանական շրջանակում, հետևաբար՝ Ադրբեջանը կամուկացի մեջ է, թե ինչ անել, ոնց անել: Ինձ թվում է՝ նրանք կփորձեն Ստերլիգովի բացասական կողմերը շեշտել և ցույց տալ, որ հանցագործ է եկել Արցախ: Ադրբեջանական քարոզչամեքենայի նպատակներից մեկն էլ  Արցախը, օրենքի տեսանկյունից, անվերահսկելի միջազգային տարածք ներկայացնելն է»,-ասել է տեղեկատվական անվտանգության փորձագետը:

403