Երևանում մեկնարկում է երիտասարդ լրագրողների միջազգային մրցույթ

ԵՐԵՎԱՆ, հուլիսի 3- Sputnik. Երևանում մեկնարկում է Հեռուստատեսության և ռադիոյի միջազգային ակադեմիայի կողմից հայտարարված «Կովկասյան տարածաշրջանի խաղաղ ապագա. ընդհանուր պատմություն և արդիականություն» միջազգային VI մրցույթը, որին կարող են մասնակցել տպագիր մամուլում, ռադիոյում և հեռուստատեսությունում աշխատող երիտասարդ լրագրողները:

Մրցույթը միտված է Ռուսաստանի, Վրաստանի, Հայաստանի, Ադրբեջանի, Աբխազիայի և Հարավային Օսեթիայի ժողովուրդների միջև բարեկամության և բարիդրացիական հարաբերությունների զարգացմանը՝ զանգվածային տեղեկատվության ոլորտում տարաբնույթ կապերի խրախուսման միջոցով:

Նյութերը պետք է ստեղծված լինեն 2015 թվականի մայիսի 1-ից մինչև հոկտեմբերի 31-ն ընկած ժամանակահատվածում ։

Մրցույթում ներկայացված է 3 անվանակարգ` «1945-2015. մեր ընդհանուր հաղթանակը», «Եվրասիական ինտեգրացիա` զարգացման և խաղաղության ճանապարհ», «Կովկաս` բարիդրացիականության տարածք»։

Յուրաքանչյուր անվանակարգում կլինի երեք հաղթող, կլինեն հատուկ մրցանակներ։ Մրցույթի հաղթողները կստանան արժեքավոր մրցանակներ և ուղևորություն Մոսկվա, որտեղ մրցանակակիրները հանդիպումներ կունենան պրոֆեսիոնալ լրագրողների ու մասնագետների հետ:

«Պրոֆեսիոնալ ժյուրին հաղթողին կորոշի միակ չափանիշի` մասնակիցների պրոֆեսիոնալիզմի հիման վրա», – ասել է Ռուսաստանի հանրային հեռուստատեսության պատմական–հրապարակախոսական ծրագրերի տնօրինության տնօրեն Լեոնիդ Մլեչինը:

Մրցույթի հայտերն ընդունվում են մինչեւ հոկտեմբերի վերջ, իսկ արդյունքներն ամփոփվելու են նոյեմբերի կեսերին։ Մրցույթին մասնակցելու համար նյութերը կարելի է ուղարկել ինչպես տպագիր, այնպես էլ էլեկտրոնային տարբերակով` ռուսերեն կամ թարգմանված։ Հայտերը պետք է ներկայացնել Հեռուստատեսության և ռադիոյի միջազգային ակադեմիա:

Հեռուստատեսության և ռադիոյի միջազգային ակադեմիան /IATR/ ոչ կառավարական հասարակական կազմակերպություն է, որի հիմնական նպատակն է ստեղծագործ փոխազդեցության տարածքի ընդլայնումը և ռադիոյի ու հեռուստատեսության աշխատակիցների միջև փոխանակումը՝ անկախ քաղաքական և աշխարհագրական սահմաններից։ IATR–ը հիմնադրվել է 2002 թվականի հոկտեմբերին, 2004 թվականին ստացել է միջազգային կազմակերպության կարգավիճակ։ Ակադեմիան միավորում է ռադիոյի և հեռուստատեսության ավելի քան 260 պրոֆեսիոնալների՝ 4 մայրցամաքների 26 երկրներից։ Ակադեմիայի նախագահն է Անատոլի Լիսենկոն։