«Հացը լեռներում». հայկական ավանդական տոների ճաշատեսակները կներկայացվեն երևանյան փառատոնի շրջանակում

ԵՐԵՎԱՆ, 12 հունիսի.Sputnik. Տասներեք հայկական ավանդական տոների ճաշատեսակներ կներկայացվեն Երևանում նախատեսված «Հացը լեռներում» տոնածիսական փառատոնի շրջանակում, ուրբաթ ասաց «Հայ խոհարարական ավանդույթների պահպանման և զարգացման» հասարակական կազմակերպության նախագահ Սեդրակ Մամուլյանը։

Այս տարի հունիսի 13–ին Թումանյանի այգում նախատեսված փառատոնը կոչվելու է «Համով–հոտով Երևան»։ Փառատոնին կներկայացվի 13 տաղավար` հայկական 13 եկեղեցական և ժողովրդական տոների ավանդական ճաշատեսակներով։

Միջոցառմանը կմասնակցեն հայկական խոհանոցը ներկայացնող ընկերություններ` ռեստորաններ, պանդոկները, խոհարարական քոլեջներ, ինչպես նաև տարբեր հասարակական կազմակերպություններ։ Նախատեսված է նաև համերգային ծրագիրը։

««Հացը լեռներում» տոնածիսական կերակուրների ցուցահանդես-փառատոնը Հայաստանում անցկացվում է 7–րդ անգամ, և այն մեզ համար ամենակարևոր խոհարարական միջոցառումն է, քանի որ այստեղ ներկայացված են ավանդական հայկական ճաշատեսակներ, որոնք մենք ժառանգել ենք մեր մեծերից», – նշեց Մամուլյանը։

Նրա խոսքով` փառատոնի օգնությամբ նրանք փորձում ենք հասարակությանը ծանոթացնել ազգային տոնածիսական կերակուրներին, որոնք հին ժամանակներից մատուցվել են Հայաստանում եկեղեցական և ժողովրդական տոների ժամանակ, և այն ճաշատեսակները մեծ իմաստ ունեն։

Երևանի քաղաքապետարանի աշխատակազմի մշակույթի և տուրիզմի վարչության տուրիզմի բաժնի պետ Մարիա Բարաղամյանն իր հերթին հավելեց, որ վերջին տարիներին քաղաքապետարանը մեծ ուշադրություն է հատկացնում տուրիզմի զարգացմանը` կազմակերպելով տարատեսակ միջոցառումներ, և ելնելով այս ծրագրից` քաղաքապետարանն աջակցում է այդ ոլորտի նախաձեռնություններին։

«Փառատոնի օգնությամբ մենք ցանկանում ենք ամառային Երևանը դարձնել ավելի հետաքրքիր զբոսաշրջիկների և մեր համաքաղաքացիների համար։ «Հացը լեռներում» փառատոնը կարևոր միջոցառում է ոչ միայն հայկական ավանդույթների պահպանման, զարգացման, այլ նաև օտարերկրացի զբոսաշրջիկներին մեր մշակութային առանձնահատկությունների ներկայացնելու տեսակետից», – նշեց Բաղրամյանը։

«Հացը լեռներում» փառատոնն իրականացվում է քաղաքապետարանի «Երևանյան ամառ 2015» եռամյա ծրագրի շրջանակում» Միջոցառումը կազմակերպել է «Հայ խոհարարական ավանդույթների պահպանման և զարգացման» ՀԿ–ն` Երևանի քաղաքապետարանի աջակցությամբ։