Ավո Ուվեզյան

Հանգչեք խաղաղությամբ, մեծե՛ր

333
(Թարմացված է 17:39 25.03.2017)
Արման Վանեսքեհյան
Նույն օրը, մի քանի ժամ տարբերությամբ երկու ականավոր հայ մահացավ:

Հայ ժողովուրդը անդառնալի կորուստ ունեցավ: Կյանքի 95-րդ տարում մահացավ փորձարկիչ օդաչու Ստեփան Միկոյանը: 91 տարեկանում` ջազմեն, «սիգարի արքա» Ավո Ուվեզյանը:

Բոլոր ժամանակների և ժողովրդների «Strangers in the nigt» հիթը՝ Ֆրենկ Սինատրայի կատարմամբ, Ավո Ուվեզյանի ստեղծագործությունն էր: Եվ իհարկե, աշխարհը չի մոռանա հայտնի սիգարները, որոնց արտադրությամբ Ուվեզյանը սկսեց զբաղվել 1986 թվականին, Դոմինիկյան Հանրապետությունում: Սա այն համաշխարհային թրենդներից է, որով հայերը հպարտանալու են միշտ:

Ստեփան Միկոյանը ԽՍՀՄ նախկին վարչապետ Անաստաս Միկոյանի որդին է, Խորհրդային Միության հերոս, 41 թվականին Մոսկվայի պաշտպանական մարտերի մասնակից, ծառայել է Ստալինգրադում և Հյուսիս-արևմտյան ճակատում: Նա հայտնի է ոչ միայն Հայրենական մեծ պատերազմին իր մասնակցությամբ: Պատերազմից հետո Ստեփանը 23 տարի Միկոյանի, Սուխոյի, Յակովլևի խորհրդային կոնստրուկտորական բյուրոյում արտադրվող նոր ինքնաթիռներ էր փորձարկում: Ստեփան Միկոյանն ավելի քան 100 տեսակի նոր թռչող սարքերով 3,5 հազար ժամ թռիչքներ է իրականացրել:

Կյանքից հեռացան աշխարհին քաջ հայտնի մարդիկ: Մարդիկ, ում կյանքն ու գործունեությունը մեզ` հայերիս համար հրաշալի առիթ է ևս մեկ անգամ համաշխարհային հանրությանը հիշեցնելու ժամանակակից քաղաքակրթության զարգացման հարցում հայերի ունեցած դերի մասին:

Սա առիթ է ևս մեկ անգամ իսկական արժեքները կեղծից, լավը վատից, բարին չարից, սպիտակը սևից, չորը թացից տարբերելու համար, ժամանակակից «քաղաքակիրթ բարիկադների» ճիշտ կողմն ընտրելու համար:

Ավո Ուվեզյանի և Ստեփան Միկոյանի մահը մեծ կորուստ է ողջ հայ ժողովրդի համար: Բացարձակ տարբեր, սակայն միևնույն ժամանակ աշխարհին նույնքան հայտնի. նրանք հայերի իրական պարծանքն էին: Մարդիկ, որոնց բարձր էին գնահատում այն երկրներում, որտեղ նրանք ապրում և աշխատում էին. Ուվեզյանին` Ամերիկայում, Միկոյանին` Ռուսաստանում:

Նրանց պակասը զգալու են ոչ միայն ամբողջ աշխարհով սփռված հայերը: Սա այն դեպքն է, երբ «սիգարի արքա», ջազմեն Ավո Ուվեզյանի և հարյուրավոր ինքնաթիռների փորձարկիչ-օդաչու Ստեփան Միկոյանի պակասը հավասար կերպով կզգա ամբողջ մարդկությունը: Հանգչեք խաղաղությամբ, մեծեր:

Русская версия

333