ԵՐԵՎԱՆ, 8 նոյեմբերի- Sputnik. Անցած յոթ օրերը չարագույժ էին ինչպես Ռուսաստանի, այնպես էլ Հայաստանի համար: Թվում էր, թե իրար հաջորդող կորստի, վշտի և բազմաթիվ հարցերի շարանը չի ավարտվելու:
Հոկտեմբերի 31-ին Եգիպտոսում կործանվեց A321 ինքնաթիռը՝ 217 ուղևորներով և անձնակազմի յոթ անդամներով: Ողբերգության ծավալն այնքան մեծ էր, որ չէր կարող անտարբեր թողնել աշխարհի ցանկացած ծայրում ապրող մարդուն՝ անկախ ազգային պատկանելությունից: Աղետալի վթարի պատճառները դեռ պարզվում են, ու այդ ընթացքում տարբեր վարկածներ են քննարկվում՝ շարժիչի պայթյուն, ինքնաթիռում տեղադրված պայթուցիկ սարք…
Ողբերգության բոլոր հանգամանքները դեռևս անհայտ են: Շատ թե քիչ ամբողջական պատկեր է ձևավորվում միայն շրջված ավտոբուսի դեպքում: Sputnik Արմենիա պորտալը զրուցել է վթարից տուժած հայերի հարազատների հետ, որոնք եկել էին Երևանի «Զվարթնոց» օդանավակայան՝ դիմավորելու Մոսկվայից հատուկ չվերթով վերադարձող իրենց հարազատներին: Կարեն Սաֆարյանի մայրը՝ Սոֆիկ Սաֆարյանը, պատմեց, որ որդին ավտովթարից առաջ քնած է եղել և արթնացել է ավտոբուսի շրջվելուց հետո:
«Կարենը վերադառնում էր դստերը տեսնելու համար, նա աղջկան ծնված օրից չէր տեսել: Աշխատում էր Ռուսաստանում և օգնում ընտանիքին: Լավ է, որ Ռուսաստանում աշխատանք կա, և նա կարողանում է ընտանիքը պահել»,- ասաց Սաֆարյանը:
Կարենը պատմեց, որ վթարից հետո առաջին րոպեներին տուժածներից շատերը շոկային վիճակում են եղել և չեն հասկացել, թե ինչ է կատարվում: Ամեն ինչ տեղի է ունեցել գիշերը, և կառավարումը կորցնելու պահին ավտոբուսի ուղևորների մեծ մասը քնած է եղել:
Ուղևորներից ոմանք էլ, օրինակ՝ Սիմոն Կարախանյանը և Գարիկ Ղասագուլյանը, չնայած վնասվածքներին, խուճապի չեն մատնվել և օգնել են վիրավորներին դուրս գալ ավտոբուսից: Ինչպես պատմում է Կարախանյանի ընկերը՝ Արմեն Ասրյանը, Սիմոնը նույնպես քնած է եղել վթարի պահին:
«Երբ ավոտոբուսը շրջվել է, նա պառկած վիճակից հայտնվել է ոտքի վրա: Սիմոնը պատմել է, որ ճիչեր է լսել, լաց, շատ արյուն է տեսել, բայց խուճապի չի մատնվել և օգնել է մյուս վիրավորներին: Ավելի ուշ նրան նստեցրել են Շտապօգնության մեքենան ու հիվանդանոց տարել»,- ասաց Ասրյանը:
Հարազատներն իրար մեջ քննարկում էին, թե ինչպես է տեղի ունեցել վթարը, ոմանք ասում էին, որ վարորդը քնել է, մյուսները պնդում էին, որ վարորդը գերազանցել է արագությունը: Մի քանիսը համոզված էին, որ վարորդը փորձել է հատակին ընկած հեռախոսը վերցնել, և հենց այդ պահին էլ տեղի է ունեցել վթարը:
«Կարենը գոհունակությամբ էր խոսում այն մասին, թե ինչ վերաբերմունք են ցուցաբերել ռուս փրկարարներն ու բժիշկները: Հայ համայնքը նույնպես նրանց պատշաճ ուշադրություն է ցուցաբերել»,- ասում է Սոֆիկ Սաֆարյանը:
Տուժածներից շատերը հրաժարվել են հոսպիտալացումից և նախընտրել են բուժվել տանը: Երևանի հիվանդանոցում այժմ երկու հիվանդ կա, իսկ Տուլայում բժիշկների մշտական հսկողության տակ է պահվում ծանր վիճակում գտնվող ևս 10 մարդ:
Վթարը կարծես պատճառ դարձավ, որ մասնավոր ուղևորափոխադրումների հարցը նոր տեսանկյունից դիտարկվի: Պատասխանելով լրագրողների հարցերին՝ Հայաստանի տրանսպորտի և կապի նախարար Գագի Բեգլարյանը նշեց, որ նոր օրինագիծ է պատրաստվում, որը կխստացնի նման ուղևորափոխադրումների հսկողությունը: Օրինագծի քննարկումից և խորհրդարանի կողմից հաստատվելուց հետո նախարարությունը որոշակի լիազորություններ կստանա, որոնք թույլ կտան բարձրանցել ուղևորների անվտանգությունը:
Ավելի վաղ այս մասին Sputnik Արմենիա պորտալի հետ զրուցել էր նաև նախարարի առաջին տեղակալ Արթուր Առաքելյանը: Նրա խոսքով՝ նախարարությունը գործում է սահմանադրության և համապատասխան օրենսդրության համաձայն, իսկ դա ոչ կանոնավոր ուղևորափոխադրումների հսկողության ոլորտում սահմանափակում է գերատեսչության հնարավորությունները:
Ինչպես նշել էր Առաքելյանը, կառավարությունն ու հենց տրանսպորտի և կապի նախարարությունը չեն ցանկանում խոչընդոտել զբոսաշրջության, ինչպես նաև բիզնեսի զարգացմանը, բայց դա չպետք է արվի ուղևորների անվտանգության հաշվին:
Նրա խոսքով՝ նոր օրինագիծը թույլ կտա լուծել շատ խնդիրներ՝ առանձնապես չսահմանափակելով գործարարների ազատությունը: Մեր այն հարցին, թե արդյո՞ք նոր օրենքի ընդունումը կազդի ուղևորափոխադրումների ոլորտում սահմանված գների վրա, Առաքելյանը պատասխանեց, որ դրա հետևանքով սակագները էական փոփոխություն չեն կրի:
Ինչպես խոստանում է նախարարությունը, օրենքը շուտով կդրվի խորհրդարանի քննարկմանը, և միայն այդ ժամանակ հնարավոր կլինի հասկանալ, թե դա ինչ է ներկայացնում իրենից և կարո՞ղ է արդյոք զգալի ազդեցություն ունենալ տվյալ պահին գրեթե չվերահսկվող ոչ կանոնավոր ուղևորափոխադրումների վրա:
Sputnik Արմենիան հորդորում է ավելի ուշադիր լինել սեփական անվտանգության հարցում, հատկապես, երբ այդ անվտանգությունը ուրիշի ձեռքում է գտնվում:
