ԵՄ-ն, ԱՄՆ-ն և մյուսները չկարողացան ապահովել ԼՂ հայերի անվտանգության երաշխիքները․ Մարուքյան
10:23 26.09.2023 (Թարմացված է: 10:39 26.09.2023)
Հատուկ հանձնարարություններով ՀՀ դեսպան Էդմոն Մարուքյանը. Արխիվային լուսանկար
© Sputnik / Aram Nersesyan
Բաժանորդագրվել
Միջազգային դերակատարները միջնորդական ջանքերի ընթացում բազմիցս հայտարարել էին Լեռնային Ղարաբաղի բնակիչների իրավունքների ապահովման անհրաժեշտության մասին։
ԵՐԵՎԱՆ, 26 սեպտեմբերի – Sputnik. ԵՄ-ն, ԱՄՆ-ը և մյուս բոլոր միջազգային սուբյեկտները չեն կարողացել ապահովել Լեռնային Ղարաբաղի հայերի անվտանգության երաշխիքները։ Այդ մասին X սոցիալական ցանցում գրել է հատուկ հանձնարարություններով ՀՀ դեսպան Էդմոն Մարուքյանը։
Նրա խոսքով՝ չնայած բազմաթիվ հայտարարություններին, նրանք չկարողացան ապահովել Լեռնային Ղարաբաղի հայերի իրավունքները։
We acknowledge that the EU, the USA and all other international actors failed to ensure the rights and security guarantees of the Armenians of Nagorno Karabakh. Notwithstanding with the fact that these actors have been repeatedly stating during their mediation efforts, that the… https://t.co/pEhGlShW39
— Edmon Marukyan (@edmarukyan) September 25, 2023
Մարուքյանը հիշեցրել է, որ իրենց միջնորդական ջանքերի ընթացքում այդ գործիչները բազմիցս հայտարարել են, որ Լեռնային Ղարաբաղի հայերի իրավունքներն ու անձեռնմխելիությունը պետք է երաշխավորվեն միջազգային մեխանիզմների շրջանակներում, որոնք նրանց թույլ կտան ապահով ապրել իրենց նախնիների հողում:
Հիշեցնենք` Ադրբեջանը սեպտեմբերի 19–ին լայնամասշտաբ հարձակում սկսեց Արցախի դեմ։ Ադրբեջանական զինուժը շփման գծի ողջ երկայնքով խախտեց հրադադարը` հասցնելով հրթիռահրետանային հարվածներ։
Ադրբեջանական ագրեսիայի հետևանքով առնվազն 200 զոհ և ավելի քան 400 վիրավոր կա։
Սեպտեմբերի 20–ին հայտնի դարձավ, որ Արցախի իշխանություններն ընդունել են ՌԴ խաղաղապահ առաքելության զորակազմի հրամանատարության՝ կրակի դադարեցման վերաբերյալ առաջարկությունը:
Բազմաթիվ բռնի տեղահանված արցախցիներ արդեն 2 օր է տեղափոխվում են ՀՀ։
