Բուժաշխատողներն ի պաշտպանություն արցախցիների` Երևանի փողոցներով իրազեկման երթ են արել
16:41 26.09.2023 (Թարմացված է: 17:11 26.09.2023)
Բուժաշխատողներն ի պաշտպանություն արցախցիների` Երևանի փողոցներով իրազեկման երթ են արել
© Sputnik
Բաժանորդագրվել
Բուժաշխատողները պահանջում են, որպեսզի Հայաստանի տարածքում արցախցու անձնագիրը լինի միակ փաստաթուղթը, որի հիման վրա նրանք կարողանան բուժօգնություն ստանալ։
ԵՐԵՎԱՆ, 26 սեպտեմբերի – Sputnik. Արցախի տեղահանված քաղաքացիները բուժհաստատություններ դիմելիս չպետք է ստանան «դուք այստեղ հաշվառված չեք», «համակարգը ձեզ ցույց չի տալիս» կամ «պետպատվեր չունեք» պատասխանները։ Այս մասին հայտնեց ի պաշտպանություն Արցախի ակցիա իրականացնող բուժաշխատողներից մեկը`«Առողջության իրավունք» ՀԿ համանախագահ Անուշ Պողոսյանը։
«ՀՀ կառավարությունը պետք է անգամ հանձնարարական տա առողջապահության նախարարությանը, որպեսզի արցախցու անձնագիրը լինի միակ փաստաթուղթը, որի հիման վրա նրանք կարողանան բուժօգնություն ստանալ։ Վերջիններս պետք է պատշաճ սպասարկվի հիվանդանոցներում կամ օգտվել արտահիվանդանոցային ծառայությունից»,– նշեց Պողոսյանը։
Ավելի վաղ հայտնել էինք, որ վերջիններս ՀՀ առողջապահության նախարարության մոտ ակցիա էին իրականացնում, իսկ հետո Երևանի փողոցներով իրազեկման երթ են արել։
Նրանք վանկարկում էին «Միացե՛ք և դատապարտե՛ք», «Փրկե՛ք կյանքեր», «պահանջում ենք պատշաճ բուժօգնություն արցախցիներին»,
Ձեռքերում էլ պահում էին Արցախում վիրավորում ստացած երեխաների նկարները, որոնց վրա գրված էր «Դատապարտում ենք»։
Բուժաշխատողներն ի պաշտպանություն արցախցիների` Երևանի փողոցներով իրազեկման երթ են արել
© Sputnik
Նշենք, որ մի շարք բժիշկներ սոցցանցերի իրենց էջերում արդեն իսկ պատրաստակամություն են հայտնել անվճար բուժօգնություն տրամադրել Արցախից տեղահանված քաղաքացիներին։
Հիշեցնենք` Ադրբեջանը սեպտեմբերի 19–ին լայնամասշտաբ հարձակում սկսեց Արցախի դեմ։ Ադրբեջանական զինուժը շփման գծի ողջ երկայնքով խախտեց հրադադարը` հասցնելով հրթիռահրետանային հարվածներ։
Ադրբեջանական ագրեսիայի հետևանքով առնվազն 200 զոհ և ավելի քան 400 վիրավոր կա։
Սեպտեմբերի 26-ի ժամը 08:00–ի դրությամբ ԼՂ-ից Հայաստան մուտք է գործել բռնի տեղահանված 13 550 անձ։ Նրանցից 11 000-ի վերաբերյալ հաշվառման տվյալներն ամփոփված են, իսկ 2 550-ի կարիքների գնահատումը նույնականացման փուլում է:
