«Ալարում են մի քիչ արագ աշխատել». հայ վարորդները 3 օր է` չեն կարողանում մտնել Հայաստան
11:13 17.12.2022 (Թարմացված է: 11:35 17.12.2022)
© Sputnik / Gor Margaryan
Բաժանորդագրվել
Վարորդները վրացական կողմում են, նրանց ասել են, որ խնդիրը հայկական կողմի թողունակությունն է։
ԵՐԵՎԱՆ, 17 դեկտեմբերի – Sputnik. Լարսի անցակետում մի քանի ամիս խցանման մեջ մնացած բեռնատարների հայ վարորդները արդեն մի քանի օր է` չեն կարողանում հատել Սադախլո-Բագրատաշեն անցակետը։ Այս մասին գրում է «Ժողովուրդ» օրաթերթը։
Թերթը գրում է, որ խմբագրություն են ահազանգել վարորդներ ու ասել, որ արդեն 3 օր է, ինչ վրացական կողմում են` Շուլավեր գյուղի մոտակայքում գտնվող ավտոկայանատեղիում:
«Մեզ ասում են, որ «տամոժնիայի» հայկական կողմում այնքան շատ են հերթերը, որ մեքենաների թողունակությունը բավական դանդաղ է իրականացվում: 2-3 ամիս հերթերի, խցանումների մեջ ենք մնացել: Սոված, ծարավ, առանց կենցաղային տարրական պայմանների օրեր ենք անցկացրել, հիմա էլ, փաստորեն, եկել ու այստեղ ենք մնացել, որովհետեւ մեր հայրենակիցները ալարում են մի քիչ արագ աշխատել, արագ կազմակերպել ամեն ինչ»,– «Ժողովուրդ» օրաթերթի հետ զրույցում ասել է բեռնատարի վարորդներից մեկը։
Խցանման մեջ մնացած հայ վարորդները կարծում են , որ սա անցակետում դանդաղ ու վատ աշխատանքի արդյունքն է։
Հիշեցնենք, որ ռուս–վրացական սահմանի «Վերին Լարս» անցակետում երթևեկությունը կաթվածահար էր եղել դեռ սեպտեմբերի վերջին։ Սահմանի ռուսական կողմում մեքենաների հերթը հասնում էր մինչև 15 կիլոմետրի։
