Կառավարությունն առաջարկում է խստացնել «Պետական և ծառայողական գաղտնիքի մասին» օրենքը
11:13 03.11.2022 (Թարմացված է: 11:47 03.11.2022)
© Photo : official site of the Prime Minister of RA
Բաժանորդագրվել
Պետական գաղտնիք չի կարող վստահվել խաղամոլ, թմրամոլ, ՀՀ քաղաքացիությունից հրաժարված ու ՀՀ–ում մշտապես չբնակվող անձանց։ Պետական գաղտնիքի հրապարակումը կարող է հանգեցնել մինչև 8 տարվա ազատազրկման։
ԵՐԵՎԱՆ, 3 նոյեմբերի – Sputnik. ՀՀ կառավարությունը օրենսդրական ծավալուն փաթեթ է մշակել, որով նախատեսվում է խստացնել պետական և ծառայողական գաղտնիքի հրապարակման համար նախատեսված պատիժը, ինչպես նաև ընդլայնել «պետական գաղտնիք» համարվող տեղեկությունների ցանկը։
Մասնավորապես, նախագծով առաջարկվում է պետական գաղտնիք համարել նաև «ծառայողական գաղտնիք» համարվող և «գաղտնի» դրոշմագիր ունեցող պետական բոլոր փաստաթղթերը։
Այդպիսիք կարող են լինել ահաբեկչությանը հնարավոր առնչություն ունեցող անձանց ու կազմակերպությունների նկատմամբ ֆինանսական մոնիտորինգի, պետական պահպանության ենթակա կառույցների անվտանգության, պետական սահմանի պաշտպանության մասին, ազգային անվտանգության ապահովմանն ուղղված միջոցառումների մասին եղկությունները։ Պետական գաղտնիքի շարքին չեն կարող դասվել պետության կողմից քաղաքացիներին, պաշտոնատար անձանց, կազմակերպություններին տրամադրվող արտոնությունների և սոցիալական երաշխիքների վերաբերյալ տեղեկությունները:
Նախագծով սահմանվել է նաև, թե որ դեպքում կարող են մերժել ՀՀ քաղաքացիներին ու օտարերկրացիներին գաղտնիք պարունակող տեղեկությունների տրամադրումը։ Դատվածության ու մոլախաղերից, թմրամիջոցներից, ալկոհոլից կախված լինելու հանգամանքներից բացի, մերժման հիմքեր կարող են լինել օտարերկրյա պետությունների հատուկ ծառայություններում աշխատելու, ազգային անվտանգությանը սպառնացող գործողություններ կատարելու մասին տեղեկությունները։
Պետական գաղտնիքին հասանելիությունը կարող է սահմանափակվել նաև այն դեպքերում, եթե անձը վերջին 3 տարին մշտապես չի բնակվել Հայաստանի Հանրապետությունում կամ դիմում է ներկայացրել Հայաստանի Հանրապետության քաղաքացիությունից հրաժարվելու` այլ պետություն մշտական բնակության մեկնելու նպատակով, ինչպես նաև նախկինում արդեն խախտել է «Պետական գաղտնիքի մասին» օրենքը։
Նախատեսվում է նաև պետական գաղտնիք պարունակող «Հատուկ կարևորության» և «Հույժ գաղտնի» դրոշմագրեր ունեցող տեղեկություններին առնչություն ունեցող անձանց տեղաշարժը որոշակիորեն սահմանափակելու դեպքերը։
Օտարերկրյա պետություններ մասնավոր այցելություններ կատարելու դեպքում անձը պարտավոր կլինի մեկնելուց առնվազն 15 օր առաջ լիազոր մարմնին տեղեկացնել նախատեսվող այցի մասին, իսկ եթե անհրաժեշտ է անհապաղ մեկնել, ապա վերադառնալուց հետո 7 օրվա ընթացքում պետք է լիազոր մարմնին ներկայացնի նախապես չտեղեկացնելու պատճառները և հիմնավորի անհապաղ մեկնելու անհրաժեշտությունը։
Կառավարությունն առաջացնում է խստացնել նաև գաղտնիքի հրապարակման դեպքում կիրառվող պատասխանատվությունը։ Ներկայում գործող Քրեական օրենսգրքով նախատեսված 1-4 տարվա փոխարեն առաջարկվում է սահմանել 3-5 տարվա, իսկ եթե այդ արարքը նաև առանձնապես խոշոր չափերի գույքային վնաս կամ ծանր հետևանք է առաջացրել` մինչև 8 տարվա ազատազրկում։
ՀՀ կառավարության այսօրվա նիստում օրինագծերի փաթեթը հավանության արժանացավ ու առաջիկայում կներկայացվի խորհրդարանի ընդունմանը։
