ԵՐԵՎԱՆ, 27 հունիսի – Sputnik. Սյունիքի մարզի Տեղ համայնքի համայնքապետարանը տեղեկացնում է, որ թշնամու զինվորները իջել են դիրքերից և արգելել գյուղացիներին խոտհավաք իրականացնել:
Համայնքապետարանի Facebook-յան էջում հրապարակված տեղեկատվության համաձայն` Տեղ համայնքի վարչական տարածքում, Տեղ–Արավուս-Խնածախ բնակավայրերի վարչական տարածքների հատման կետում գտնվող «Անդրուն քարեր» կոչվող դաշտամասից մի փոքր վերև թշնամին դիտակետեր է տեղակայել:
Տեղ գյուղի բնակիչները երեկ՝ հունիսի 26-ին, գնացել են նշված տարածք՝ հավաքելու հնձած խոտը, սակայն թշնամու զինվորները իջել են դիրքերից և արգելել խոտհավաքը։
Առավոտյան Տեղ համայնքի ղեկավարին են դիմել մի խումբ բնակիչներ, ներկայացրել իրավիճակը և տեղեկացրել, որ տեխնիկան չի կարողանում մտնել տարածք։ Ներսես Շադունցը, Առաջին բանակային կորպուսի հրամանատարական կազմի, Արավուսի վարչական ղեկավարի և փորձառու կամավորականների հետ կարճ ժամանակահատվածում գնացել են դաշտամաս, կանգնել մեր բնագծի երկայնքով և կազմակերպել բերքահավաքը։
«Դաշտից բերքն ամբողջությամբ հանելուց հետո է միայն մեր ղեկավարությունը հեռացել տարածքից»,- հայտնում են Տեղ համայնքից։
Այս կերպ, Տեղ համայնքի բնակիչներին հաջողվել է «Անդրուն քարեր» դաշտամասից կազմակերպվեց խոտհունձն ու բերքի տեղափոխումը:
