ԵՐԵՎԱՆ, 20 հունիսի – Sputnik. Քվեաթերթիկների վրա հնարավոր տպագրական խնդիրների առկայության դեպքում այդ քվեաթերթիկներն անվավեր չեն համարվի։
Աբովյանի ընտրատեղամասերից մեկում ընտրողը փորձել է դուրս հանել քվեաթերթիկը
Այս մասին ՀՀ ԿԸՀ նախագահ Տիգրան Մուկուչյանն ասել է «Հետքին» տված հարցազրույցում՝ արձագանքելով երկրորդ նախագահ Ռոբերտ Քոչարյանի գլխավորած «Հայաստան» դաշինքի ներկայացուցիչների ահազանգերին, թե 24 համարի քվեաթերթիկների վրա առկա են տպագրական նշումներ, որոնց պատճառով դրանք հետագայում կարող են անվավեր համարվել։
«70 մլն քվեաթերթիկ է տպագրվել, և հնարավոր է, որ դրանց վրա ինչ–որ խոտաններ առկա լինեն։ Հանձնաժողովները նախազգուշացված են, բոլոր այդ քվեաթերթիկները փորձում են առանձնացնել։ Բայց և միանշանակ պարզ է, որ նշում կամ գրառում կատարելը պետք է վերաբերվի նրան, որ ընտրողը դրանով փորձում է բացահայտել իր քվեն։ Հետևաբար, ՏԸՀ–ների համար, իհարկե, խնդիրը պետք է լինի ամփոփել ընտրությունների արդյունքը Ընտրական օրենսգրքին համապատասխան»,– ասել է Մուկուչյանը։
Նա ընդգծել է, որ, անկախ նրանից, թե որ քաղաքական ուժի քվեաթերթիկի վրա է հայտնաբերվում տպագրական խոտանը, այն համարվելու է վավեր քվեաթերթիկ, եթե, իհարկե, այլ կարգի հատուկ նշումներ չպարունակի։
Նշենք, որ այսօր առավոտյանը ժամը 08։00–ին Հայաստանում տրվեց ԱԺ արտահերթ ընտրությունների մեկնարկը 2008 ընտրատեղամասում։ Տեղամասերից 479–ը տեղակայված են մայրաքաղաք Երևանում, 1 529–ը` մարզերում։
Ընտրողների ցուցակներում այս պահին ընդգրկված է 2 մլն 593 հազար 572 ընտրող: Բոլոր քաղաքական ուժերի ընտրական ցուցակներում միասին վերցրած ընդգրկված է 2510 թեկնածու: Ընտրություններին կհետևեն 8 միջազգային և օտարերկրյա դիտորդական առաքելություն իրականացնող կազմակերպություններ՝ թվով 833 միջազգային դիտորդներ։
Արտահերթ ընտրություններին մասնակցում է 25 քաղաքական ուժ, որից 4-ը դաշինք են, 21-ը` կուսակցություն։
Ուր զանգել ընտրությունների ժամանակ խնդիր տեսնելիս․ ՄԻՊ-ը հեռախոսահամարներ է տրամադրել
