ԵՐԵՎԱՆ, 2 նոյեմբերի - Sputnik. Արցախցի մի քանի տասնյակ կանայք և երեխաներ հավաքվել են Երևանում ԱՄՆ դեսպանատան առջև` պահանջելով ճանաչել Արցախի անկախությունը և դադարեցնել ընթացող պատերազմը:
«Տիկին Թրեյսի (Հայաստանում ԱՄՆ դեսպան Լին Թրեյսի, - խմբ.), դուրս եկեք մեզ մոտ, նայեք մեր աչքերին, լսեք մեր խոսքերը, արձագանքեք մեր ցավին», - ասում է մասնակիցներից մեկը։
Երեխաները վանկարկում են` «Մի՛ լռիր», «Դուրս արի»:
Ակցիայի մասնակիցները պահում են «Այս սերնդի հետ չեք կարող խաղալ», «Ճանաչեք Արցախը», «Կանգնեցրեք Էրդողանին և Ալիևին» գրություններով պաստառներ։
Միևնույն ժամանակ, Երևանում` ՄԱԿ-ի շենքի դիմաց, տեղի է ունենում ևս մեկ ակցիա: Մասնակիցները վանկարկում են «Կանխե՛ք նոր ցեղասպանությունը», «Մի՛ լռեք», «Վե՛րջ ահաբեկչությանը»:
Բողոքողները նախազգուշացնում են, որ չեն հեռանա, քանի դեռ Հայաստանում ԱՄՆ-ի և ՄԱԿ-ի ներկայացուցիչները չեն հանդիպել իրենց հետ:
ԱՄՆ դեսպանատան դիմաց հավաքված ցուցարարները սպառնում են վրան տեղադրել տարածքում, իսկ ՄԱԿ-ի շենքի մոտ բողոքողներն արդեն իսկ նստել են բակում և մտադիր չեն հեռանալ:
Նշենք, որ անցյալ շաբաթ տեղի ունեցան մեծ բողոքի ցույցեր ՄԱԿ-ի և ԱՄՆ-ի երեւանյան գրասենյակների դիմաց: Երկու ակցիաների մասնակիցները պահանջում էին մեկ բան` միջազգային հանրությունը պետք է խախտի լռությունը և գնահատական տա Արցախում ադբրեջանա–թուրքական ագրեսիային։
Հիշեցնենք, որ Արցախի դեմ Ադրբեջանի սանձազերծած պատերազմի հետևանքով շուրջ 90 000 արցախցի տեղահանվել է, կորցրել տունը և ունեցվածքը:
Սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Նոյեմբերի 1-ի ժամը 14։00-ի դրությամբ` հակառակորդի կրակոցների հետևանքով Արցախում զոհվել են 1166 զինծառայողներ և 45 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 6997 զոհ ունի և բազմաթիվ վիրավորներ։
Ըստ վերջին տվյալների՝ Ադրբեջանի զինված ուժերը կորցրել են 241 անօդաչու սարք, 16 ուղղաթիռ, 25 ինքնաթիռ, 669 տանկ և ՀՄՄ, 6 ՏՈՍ-1 «Սոլնցեպեկ» համազարկային կրակի ռեակտիվ համակարգ:
Ես չգնամ, էլ ո՞վ գնա. Արցախից եկած մարզիկն ու մարզիչը պատմում են տղաների հերոսության մասին
Սեպտեմբերի 29–ից սկսած ադրբեջանական զինուժը մերթընդմերթ կրակ է բացում նաև Հայաստանի ուղղությամբ։
Անմարդկային են կռվում․ հադրութցի Մարո բաբոն սպասում է հաղթանակին ու «հնդկական» երեկոներին
