ԵՐԵՎԱՆ, 17 օգոստոսի - Sputnik. Իրավապահները հասարակական տրանսպորտում հերթական գրպանահատության դեպք են բացահայտել։ Ոստիկանության մամուլի ծառայությունից հայտնում են, որ դեպքի մասին ահազանգը ստացել են օգոստոսի 12-ին՝ առավոտյան ժամը 9-ի սահմաններում։ Ըստ ստացված տվյալների՝ ահազանգից րոպեներ առաջ թիվ 54 երթուղու միկրոավտոբուսում մի կնոջ պայուսակից դրամապանակ էին հափշտակել, որի մեջ գումար, անձնագիր ու կուտակային քարտեր էին:
«Ոստիկանության Նոր Նորքի բաժնի ծառայողները սկսեցին համապատասխան միջոցառումներ ձեռնարկել: Եվ , քրեական հետախույզների պրոֆեսիոնալ գործողությունների շնորհիվ, դեպքից ժամեր անց գողությունը բացահայտվեց»,- նշված է ոստիկանության տարածած հաղորդագրության մեջ։
Կեսօրից հետո՝ ժամը 16-ի սահմաններում իրավապահները Գայի պողոտայից բերման են ենթարկել Բուզանդ փողոցի 46-ամյա մի բնակչուհու:
Բռնվել է, բայց գող չէ. ոստիկանությունը չի կարողանում «ջեբկիրների» դեմն առնել
Նա տվել է խոստովանական բացատրություն: Գողոնն առգրավված է:
Փաստի առթիվ նախապատրաստվում են նյութեր: