ԵՐԵՎԱՆ, 5 օգոստոսի- Sputnik. Հայաստանում ներկա պահին կորոնավիրուսով հիվանդ ծանր ու ծայրահեղ ծանր վիճակում գտնվող քաղաքացիների թիվը տատանվում է 350-ի սահմանում: Այս մասին այսօր ՀՀ պարետատան նիստի ավարտին կայացած ճեպազրույցում հայտնեց ՀՀ առողջապահության նախարար Արեն Թորոսյանը` նշելով, որ 300 քաղաքացի գտնվում են ծանր, 68-ը՝ ծայրահեղ ծանր վիճակում, նրանցից 24-ը միացված են թոքերի արհեստական օդափոխության սարքերին:
«Եթե կհիշեք, ես այդ մասին միշտ ասում եմ, մեր ամենավատ օրերին մեր ծանր ու ծայրահեղ ծանր հիվանդների թիվը 650-ի էր հասնում»,- ասաց նա:
Նախարարն ընդգծեց, որ նվազում է գրանցվել նաև կորոնավիրուսից մահացության ցուցանիշում: Նրա խոսքով՝ յուրաքանչյուր 100 նոր դեպքը նշանակում է մոտ 2 մահ՝ անկախ այն բանից, թե որքան լավ բուժում կստանան այդ հիվանդները:
«Հետևաբար, հիվանդությունների ցածր թիվը նշանակելու է նաև ցածր թվով մահեր, և մենք հույս ունենք, որ այդ թիվն, ի վերջո, կհասնի զրոյի»,- հավելեց Թորոսյանը:
Կորոնավիրուսային իրավիճակը բարելավվում է, բայց վատ լուրեր կան
Նախարարը տեղեկացրեց, որ կորոնավիրուսի բուժման մեջ ներգրավված 20 հիվանդանոցների փոխարեն այս պահին աշխատում են 15-ը, մյուսներն անցել են իրենց հիմնական պրոֆիլայիին աշխատանքին: Նախատեսվում է, որ ևս 2-ն շուտով կվերադառնան իրենց բնականոն աշխատանքին:
Ըստ Թորոսյանի՝ կառավարության նպատակն է Հայաստանում ունենալ մի փոքր բաժանմունք, որը կզբաղվի փոքր թվով կորոնավիրուսով հիվանդների բուժմամբ:
