ԵՐԵՎԱՆ, 20 ապրիլի - Sputnik. Հայաստանում հայտարարված արտակարգ դրության ընթացքում 124 ոստիկան ինքնամեկուսացել է, 30-ը՝ մեկուսացվել: Այս մասին լրագրողների հետ հանդիպմանը հայտնեց ՀՀ ոստիկանության պետի տեղակալ Հայկ Մհրյանը:
«Թեստավորում անցած 20 ոստիկաններից 10-ի մոտ վարակը հաստատվել է: Նրանցից 5-ն արդեն առողջացել են»,- ասաց նա:
Մհրյանը նշեց նաև, որ արտակարգ դրության ընթացքում ոստիկանության աշխատակիցները կազմել են սահմանափակումների ռեժիմի խախտման 10 377 արձարագրություն, որից ավելի քան 6000-ը վճարվել է, 35-ը՝ դատարանի որոշմամբ՝ կարճվել:
Փոխոստիկանապետի խոսքով՝ այս ընթացքում ոստիկանությունը հսկողություն է իրականացրել նաև ՀՀ տարածքում թաղումների, հուղարկավորության արարողությունների ժամանակ՝ 20 հոգուց ավելի հավաքույթները բացառելու նպատակով:
Պաշտոնից ազատվել է Ոստիկանության անձնագրային և վիզաների վարչության անձնագրային բաժնի պետը
«Ոստիկանությունը հսկողություն է ապահովել 1606 հուղարկավորության նկատմամբ, ինչպես նաև ապահովել արտերկրից ստացված 18 փակ դագաղներով հուղարկավորությունների իրականացումը՝ պարետի կողմից սահմանված կարգին համապատասխան»,- նշեց Մհրյանը:
Մհրյանը համաձայնեց լրագրողների այն դիտարկմանը, որ Երևանի փողոցներում մարդկանց քանակն ու տեղաշարժը նկատելիորեն ավելացել է:
«Մեր քաղաքացիների քանակն ավելացել է: Դա ոստիկանությունը կապում է նրա հետ, որ պարետի որոշմամբ որոշակի տնտեսական սահմանափակումներ հանվեցին ու մարդիկ գնում են աշխատանքի, աշխատանքից տուն»,-հավաստիացրեց փոխոստիկանապետը:
Հիշեցնենք, որ կորոնովիրուսի տարածումը կանխելու համար Հայաստանում մարտի 16-ից ապրիլի 14–ն արտակարգ դրություն էր սահմանվել։
Ապրիլի 11–ին կառավարության նիստի ժամանակ ՀՀ փոխվարչապետ, պարետ Տիգրան Ավինյանն առաջարկեց ևս 30 օրով երկարաձգել այդ ռեժիմը։
7000-ից ավելի մարդ է տուգանվել պարետի որոշումը խախտելու համար
Ապրիլի 13–ին գործադիր մարմինն արտահերթ նիստում միաձայն ընդունեց հանրապետությունում արտակարգ դրության ռեժիմը 30 օրով երկարաձգելու որոշումը։ Այն կտևի մինչև 2020 թվականի մայիսի 14-ը` ժամը 17:00-ն ներառյալ։
