ԵՐԵՎԱՆ, 7 մարտի – Sputnik. Արխանգելսկի հացագործարանում սկսել են հայկական լավաշ թխել։ Տեղեկությունը հայտնում է Region29.ru–ն` նշելով, որ լավաշը հացի հնագույն տեսակներից է։
Լավաշը թխվում է ժամանակակից սարքավորումներով։
«Այժմ արդեն տանը հնարավոր կլինի շաուրմա պատրաստել», – գրում է կայքը` ընդգծելով, որ լավաշը թխում են առանց խմորիչի` միայն ջուր, ալյուր և աղ։
«Արխանգելսկխլեբ»» ՓԲԸ–ի լաբորատորիայի պետ Ելենա Նեմշիլովայի խոսքով` լավաշը մեծ պահանջարկ է վայելում, գնում են թե՛ տոն օրերին, թե՛ ամեն օր։
«Տանը կարելի է լավաշով ռուլետներ, շաուրմա և տարատեսակ միջուկներով (պանիր, կաթնաշոռ, երշիկեղեն) նախուտեստներ պատրաստել»,– ասում է նա։
Հայկական լավաշից պատրաստվող նախուտեստների քանակը կախված է սառնարանի պարունակությունից և խոհարարի երևակայությունից։
Բաղադրատոմսերի ցանկը կարելի է գտնել համացանցում։ Ըստ հոդվածագրի` ցանկացած հարցման դեպքում լավաշով պատրաստվող մոտ 250 բաղադրատոմս է առաջարկվում։
Կայքն ընդգծում է, որ նորույթը ոչ միայն համեղ է, այլև օգտակար. «Միաժամանակ և՛ դիետիկ է, և՛ սննդարար։ Որքան ուզես, կարող ես ուտել։ Գիրանալու վտանգ չկա»։
CNN–ը հայկական լավաշը ներառել է աշխարհի 50 լավագույն հացերի ցանկում
Լավաշի թխման եզակի տեխնոլոգիայի շնորհիվ պահպանվում է ցորենի ալյուրի արժեքավոր նյութերի մեծ մասը` ֆոսֆոր, բջջանյութ, պղինձ, մանգան, երկաթ, ցինկ, մագնիում, ինչպես նաև В1, В3, В6, Е և РР վիտամինները։
Կայքը նշում է` լավաշն օգնում է կարգավորել օրգանիզմի ածխաջրերի մակարդակը, օգտակար է ինչպես իմունային համակարգի ամրապնդման, այնպես էլ մարսողության համար։
