ԵՐԵՎԱՆ, 223 հունվարի – Sputnik. «Էրեբունի պլազա» բիզնես կենտրոնում այսօր կրակոցներ արձակած անձի և ոստիկանության պետի ժամանակավոր պաշտոնակատար Արման Սարգսյանի բանակցությունները քննարկման թեմա են դարձել սոցցանցերում. շատերին հետաքրքրում է, թե ինչու վնասազերծված անձը ձեռնաշղթաներով չէր։ Ոստիկանությունն այդ առնչությամբ հայտարարություն է տարածել։
«Սոցցանցերում տարածվել է Արման Սարգսյանի վարած բանակցությունների ձայնագրությունը․ զենքը հանձնելու պայմանավորվածություն ձեռք է բերվում նաև ձեռնաշղթաներ չհագցնելու պայմանով:Այսինքն` ձեռնաշղթաներ չհագցնելը բանակցության պայման է եղել և վնասազերծման կարևոր բաղադրիչ»,– նշված է հաղորդագրության մեջ:
Ոստիկանությունը չիմացածի, չպատկերացրածի վերաբերյալ դատողություններ անողներին հորդորում է ձեռնպահ մնալ սիրողական մեկնաբանություններից:
Հիշեցնենք` «Էրեբունի պլազա» բիզնես կենտրոնում այսօր` հունվարի 23-ին, կրակոցներ էին հնչել։ Ոստիկանությունը 14։40 ահազանգ էր ստացել, որ շենքում զինված անձ կա։ Անմիջապես դեպքի վայր էին մեկնել օպերատիվ խմբերը։
Տեղեկություններ տարածվեցին, որ կրակոցներ արձակած անձը պատանդ է վերցրել։
Ոստիկանությունն ավելի ուշ հերքեց այդ լուրը։ Ոստիկանության լրատվական վարչության պետ Աշոտ Ահարոնյանը լրագրողների հետ զրույցում հայտնեց, որ կրակոցներ արձակած անձի հետ բանակցում է անձամբ ոստիկանապետի պաշտոնակատար Արման Սարգսյանը։
«Նախնական տեղեկություններով` խոսքը մեկ մարդու մասին է։ Ոստիկանապետը բանակցում է նրա հետ։ Զենքը հանձնել է»,– ասաց նա։
Բացառիկ տեսանյութ. ինչպես է զինված տղամարդը մտնում «Էրեբունի պլազա»
Հիշեցնենք` «Էրեբունի պլազա» բիզնես կենտրոնում գործում են մի շարք գրասենյակներ, այդ թվում` «5–րդ ալիք» հեռուստաընկերությունն ու ՀՀ երկրորդ նախագահ Ռոբերտ Քոչարյանի գրասենյակը։
Օրվա կադր. ինչպես են տանում «Էրեբունի պլազայում» կրակողին. տեսանյութ
