ԵՐԵՎԱՆ, 18 դեկտեմբերի — Sputnik. Եվրասիական տնտեսական հանձնաժողովն աշխատում է հայկական վարորդական իրավունքի վկայականն ընդունելու համաձայնագրի ուղղությամբ։ Այս մասին խորհրդարանում ասաց ՀՀ ԱԺ տարածաշրջանային և եվրասիական ինտեգրման հարցերի մշտական հանձնաժողովի նախագահ Միքայել Մելքումյանը` պատասխանելով Sputnik Արմենիայի հարցին։
Նրա խոսքով` ժամանակին Ռուսաստանի Պետդումայի ԱՊՀ հարցերով հանձնաժողովի առաջին փոխնախագահը հայտարարել է, որ հարցը կլուծվի մինչև ընթացիկ տարվա վերջ։
«Նոյեմբերի կեսին ԵԱՏՀ կոլեգիայից ես հաղորդագրություն ստացա, որ ԵԱՏՄ շրջանակում պատրաստվում են քննարկել հարցի լուծումը։ Որովհետև այսօր Ռուսաստանի օրենսդրությունում այդ կետը հակասում է ԵԱՏՄ–ում Մոսկվայի պարտավորություններին», – ասաց Մելքումյանը։
Նա նշեց, որ Հայաստանում նույնպես կընդունվի համապատասխան որոշում, բայց ՀՀ քաղաքացի-վարորդներն ավելի շատ են Ռուսաստանում, քան հակառակը։
Նրա խոսքով` պետք է սպասել, մինչև որոշումը պատրաստ կլինի, և ԵԱՏՄ բոլոր երկրները կվավերացնեն այն։ Մելքումյանը չբացառեց, որ հարցը պարունակում է քաղաքական բաղադրիչ։
Վարորդները 2020թ–ի հունվարի 1-ից կսկսեն տուգանվել բալային նոր համակարգով
Ավելի վաղ Ռուսաստանի մարդու իրավունքների հանձնակատար Տատյանա Մոսկալկովան չի բացառել Ռուսաստանում Հայաստանի քաղաքացիների համար վարորդական իրավունքի վկայականները հաստատելու համար առանձին քննություն սահմանելը։
Հայ վարորդները քննությո՞ւն կհանձնեն Ռուսաստանում. մեկնաբանում է Ռուսաստանի օմբուդսմանը
Ըստ ՌԴ օրենսդրության, աշխատանքի ընդունվելիս վավերական են միայն այն երկրների վարորդական իրավունքները, որտեղ ռուսերենը պաշտոնական կարգավիճակ ունի, այդ պատճառով Ռուսաստանում վճարովի աշխատանքի համար ճանաչվում են ԵԱՏՄ անդամ բոլոր երկրների վարորդական իրավունքները, բացի Հայաստանից։
