Դիտարկելով արդեն նախկին ԱԱԾ տնօրեն Արթուր Վանեցյանի հրաժարականի հայտարարությունը` քաղաքագետ Դանիելյանը նշում է, որ Վանեցյանն իր հայտարարությամբ գնացել է դեմարշի և ասել, որ ստանում է հրահանգներ, որոնք սպայի պատվին ու արժանապատվությանը, ուսադիրներին հարիր չեն, անհամատեղելի են։
«Արթուր Վանեցյանի հայտարարությունն ահազանգ է»,–նշում է Դանիելյանը։
Ինչ վերաբերում է Ազգային ժողովի «Լուսավոր Հայաստան» խմբակցության հեղինակած Ազգային անվտանգության ծառայության տնօրենի և Ոստիկանության պետի պաշտոնները քաղաքական համարելու օրենքի նախագծին, ապա ըստ քաղաքագետի, «Լուսավոր Հայաստանի» նախաձեռնություն ասածը պետք է դնել չակերտների մեջ։
««Լուսավոր Հայաստանը» ծառայություն է մատուցել Նիկոլ Փաշինյանին, որպեսզի վերջինը կարողանա ԱԱԾ–ի և Ոստիկանության ղեկավարներ նշանակել մարդկանց, որոնք սպաներ չեն, քաղաքական դեմքեր են ու ենթարկվում են վարչապետին»,–նկատում է Ստեփան Դանիելյանը։
Նրա կարծիքով` ուժային երկու կառույցների ղեկավարներ կնշանակվեն ոչ սպաներ, որոնք կկատարեն հախուռն ու անտրամաբանական հրամանները։
«Դրա բացասական ազդեցությունը, կարծում եմ, ակնհայտ է, քանի որ այդ ուժային կառույցները դուրս են լինելու հանրային և խորհրդարանական վերահսկողությունից և կատարելու են Նիկոլ Փաշինյանի հրահանգները»,–նշում է քաղաքագետը։
Ստեփան Դանիելյանի խոսքով` ըստ երևույթին, փորձեր կլինեն ռեպրեսիաներ իրականացնելու, ինչը չի հաջողվի։
Քոչարյանի գործով ՍԴ որոշումն ակնհայտորեն ապօրինի էր. Նիկոլ Փաշինյան
«Երկրորդ բացասական երևույթը կլինի այն, որ ԱԱԾ-ն ու ոստիկանությունը կսկսեն քայքայվել ու բարոյալքվել, քանի որ պահպանողական կառույցներ են, որոնք ունեն իրենց ներքին գրված ու չգրված օրենքները»,–ասում է Դանիելյանը։
Որևէ դրական բան այս ամենում քաղաքագետը չի տեսնում։
Հիշեցնենք, այսօր Վանաձորում կայացած ասուլիսի ժամանակ ՀՀ վարչապետ Նիկոլ Փաշինյանը հայտարարեց, որ ստորագրել է Ազգային անվտանգության ծառայության տնօրեն Արթուր Վանեցյանի` աշխատանքից ազատման միջնորդագիրը։
