ԵՐԵՎԱՆ, 11 հուլիսի — Sputnik. Հայտնի բրիտանացի իրավապաշտպան Ամալ Քլունին (Ջորջ Քլունիի կինը` խմբ.)`, Ջուլիան Ասանժին որպես փաստաբան խորհուրդ է տվել դիվանագիտական պաշտոն խնդրել Էկվադորի դեսպանատանը։ Դա թույլ կտար նրան փախչել Բրիտանիայից` պաշտպանվելով դատական հետապնդումից։ Քլունին նաև դիտարկել է Էկվադորի քաղաքացուհու հետ Ասանժի ամուսնանալու հնարավորությունը` քաղաքացիություն ստանալու համար։
Այս մասին հայտնի է դարձել հուլիսի 10–ին Լոնդոնում կայացած ԶԼՄ–ների ազատության հարցերով գլոբալ համաժողովից տեղեկատվության արտահոսքի հետևանքով, հաղորդում է Daily Mail–ը։
Ամալ Քլունին Ասանժի փաստաբանն էր 2012թ.–ին, երբ նա թաքնվել էր Լոնդոնում Էկվադորի դեսպանատանը։
Հուլիսի 10–ին Լոնդոնում ԶԼՄ–ների ազատության հարցերով գլոբալ համաժողովի մասնակիցներին դիմավորել են WikiLeaks–ի հիմնադիր Ջուլիան Ասանժի կողմնակիցները։ Նրանց պահած պաստառների վրա գրված է եղել. «Ազատություն Ասանժին, ոչ ԱՄՆ արտահանձնմանը», «Ձեռքերդ հեռու Ասանժից», «Հանտը ստախոս է, Քլունին` դավաճան» (խոսքը Մեծ Բրիտանիայի ԱԳՆ ղեկավար Ջերեմի Հանտի և իրավաբան Ամալ Քլունիի մասին է, որոնք մասնակցում էին համաժողովի լիագումար նիստերին)։
ԱՄՆ իշխանությունը մայիսի վերջին մեղադրանք է ներկայացրել Ասանժին լրտեսության ու գաղտնի տեղեկության բացահայտման մասին օրենքի 17 կետերի խախտման մեջ։ Ավելի վաղ նրան մեղադրում էին մեկ կետով՝ համակարգչային ներխուժման մասին հանցավոր համաձայնության գալու համար։ Եթե Ասանժին ԱՄՆ-ին հանձնեն, նրան երկար տարիների ազատազրկում է սպասում։
2010 թվականին, երբ ամերիկյան իշխանությունը հետաքրքրվել էր նրանով, WikiLeaks-ի հիմնադիրը Շվեդիա էր մեկնել, որտեղ մտադիր էր ապաստան ստանալ։ Հետագայում նրան մեղադրել էին սեռական բնույթի հանցագործությունների մեջ։ Ասանժը հերքում էր մեղադրանքները։ 2012 թվականից նա թաքնվում էր Էկվադորի դեսպանատանը՝ վախենալով արտաքսվելուց։
Բանտում գտնվող Ջուլիան Ասանժը. բացառիկ կադրեր
2019 թվականի ապրիլի 11-ին նրան ձերբակալել էին Շվեդիայի ու ԱՄՆ- օրդերներով։ Լոնդոնի դատարանը նրան մեղավոր էր ճանաչել գրավի դիմաց ազատվելու պայմանները խախտելու մեջ ու դատապարտել էր 11 ամիս ազատազրկման։
Այժմ դատարանն ԱՄՆ-ից փաստաթղթերի ամբողջական փաթեթին է սպասում, որը թույլ կտար որոշում կայացնել՝ թույլ տալ մեղադրյալի արտաքսումը ԱՄՆ, թե ոչ։
