ԵՐԵՎԱՆ, 10 հուլիսի — Sputnik. Երևանի օդանավակայանն աշխատում է ավտոնոմ էլեկտրասնուցման աղբյուրներով։ Հայտնում են օդանավակայանից` հավելելով, որ դրանց շնորհիվ օդանավակայանի բնականոն աշխատանքը չի տուժել։ «Չվերթներն իրականացվել են ժամանակին։ «Զվարթնոց» միջազգային օդանավակայանը տեխնիկապես պաշտպանված է նման դեպքերից»:
Այդուհանդերձ, օդանավակայանում չեն հերքում, որ օրվա ընթացքում շուրջ կես ժամով հոսանքազրկվել են «Հայաստանի էլեկտրական ցանցեր» ՓԲԸ-ի կողմից: Բայց, դրանից հետո անցել են ավտոնոմ սնուցման տարբերակին։
Հիշեցնենք` այսօր Երևանում ու Հայաստանի որոշ մարզերում հոսանքի համատարած տատանումներ ու անջատումներ են գրանցվել։ Խափանումներ են եղել ինտերնետ համակարգում, հեռախոսակապում և Երևանի մետրոյի աշխատանքում։
ԱԻՆ ճգնաժամային կառավարման կենտրոնը հայտարարել է, որ նախարար Ֆելիքս Ցոլակյանն անձամբ է ճշտում, թե ինչ է կատարվում Հայաստանի էներգետիկ համակարգում։
Մութ կայարաններ, շփոթված ուղևորներ. ի՞նչ էր կատարվում Երևանի մետրոյում. տեսանյութ
Փոխվարչապետ Տիգրան Ավինյանը ֆեյսբուքում հայտնել է, որ հոսանքի համատարած անջատումները պայմանավորված են 2 խոշոր էլեկտրակայաններում` Երևանի ՋԷԿ–ում ու Հրազդանի ՋԷԿ–ում տեղի ունեցած խոշոր վթարներով։
