ԵՐԵՎԱՆ, 13 մարտի — Sputnik. Հայաստանի կառավարությունն ինքը պետք է որոշի ղարաբաղյան հակամարտության կարգավորմանն ուղղված բանակցությունների ձևաչափը։ Այսօր Երևանում կայացած ասուլիսի ժամանակ այս մասին ասաց ԵԱՀԿ գործող նախագահ, Սլովակիայի արտաքին գործերի նախարար Միրոսլավ Լայչակը։
Մեկնաբանելով բանակցությունների ձևաչափի հնարավոր փոփոխությունը` Սլովակիայի արտգործնախարարը նշեց, որ, անկասկած, Հայաստանի կառավարությունն ինքը պետք է որոշում կայացնի այդ հարցում, սակայն ցանկացած փոփոխություն պետք է ընդունելի լինի բոլոր կողմերի համար։
«Մենք բավականաչափ ժամանակ ենք տրամադրել այդ խնդիրների քննարկմանը։ Վստահ եմ` Հայաստանի կառավարությունը ճիշտ բանաձև ունի համապատասխան ձևաչափով բանակցությունները շարունակելու համար», – նշեց Լայչակը։
Հարցին` արդյո՞ք ԵԱՀԿ նախագահը մտածել է Արցախ այցելելու և սովորական մարդկանց կյանքը տեղում տեսնելու մասին, Լայչակը պատասխանեց, որ պատրաստ է անել ամեն ինչ` հակամարտության լուծմանն օգնելու համար։
«Ես լիովին վստահում եմ ԵԱՀԿ Մինսկի խմբի համանախագահներին ու պարոն Կասպրշիկին (ԵԱՀԿ գործող նախագահի անձնական ներկայացուցիչ. խմբ.): Ինչ անում եմ` նրանց հետ համակարգված եմ անում», – ավելացրեց նախարարը։
Հիշեցնենք` Նիկոլ Փաշինյանը ՀՀ վարչապետի պաշտոնը ստանձնելու առաջին իսկ օրերից հայտարարում է, որ բանակցություններին պետք է մասնակցի նաև Արցախը։ Վարչապետի շեշտում է, որ ինքը չի կարող խոսել Արցախի ժողովրդի անունից։
