ԵՐԵՎԱՆ, 17 Դեկտեմբեր — Sputnik. Վարչապետին պաշտանակատար Նիկոլ Փաշինյանը Ռուսաստանի նախագահ Վլադիմիր Պուտինի հետ քննարկումներում մշտապես բարձրացրել է Ռուսաստանի կողմից Ադրբեջանին վաճառվող զենքի խնդրահարույց հարցը:
Այս մասին «Արմենպրեսի» հետ զրույցում ասել է ՀՀ վարչապետի պաշտոնակատարի մամուլի խոսնակ Արման Եղոյանը` անդրադառնալով Բելառուսի նախագահ Ալեքսանդր Լուկաշենկոյի հայտարարությանը, թե ինչու Նիկոլ Փաշինյանն Ադրբեջանին զենք վաճառելու հարցը չի դնում նաև Ռուսաստանի առաջ:
«Անդրադառնալով պարոն Լուկաշենկոյի հայտարարությանն՝ անհրաժեշտ եմ համարում մի քանի կարևոր արձանագրում անել:
Ցավոք, պարոն Լուկանշենկոն շարունակում է փակ հանդիպումների բովանդակությունը հրապարակելու պրակտիկան:
Ցավոք, նա հերթական փակ հանդիպումից հրապարակում է միայն այն, թե ինչ է ասել ինքը և չի հրապարակում այն, թե ինչ պատասխաններ է ստացել ՀՀ վարչապետից»,–ասել է Եղոյանը:
Եղոյանը ընդգծել է, որ Նիկոլ Փաշինյանը Ռուսաստանի նախագահի հետ քննարկումներում մշտապես, իսկ պարոն Լուկաշենկոյի հիշատակած հանդիպման ընթացքում մասնավորապես, բարձրացրել է Ռուսաստանի կողմից Ադրբեջանին վաճառվող զենքի խնդրահարույց հարցը:
Նա նաև նշել է, որ Հայաստանը տրամադրված է շարունակել քննարկումները ՀԱՊԿ շրջանակում՝ կազմակերպության անդամ երկրների փոխադարձ դաշնակցային պարտավորությունների լիարժեք կատարումն ապահովելու ուղղությամբ:
Հիշեցնենք, որ Բելռուսիայի նախագահ Ալեքսանդր Լուկաշենկոն հայտարարել էր, թե ինչու Նիկոլ Փաշինյանը Վլադիմիր Պուտինին չի մեղադրում Ադրբեջանին զենք վաճառելու մեջ, այլ միայն իրեն, երբ իր երկիրն այդ հարցում 4–րդ տեղն է զբաղեցնում Ռուսաստանից, Իսրայելից և Թուրքիայից հետո։
