ԵՐԵՎԱՆ, 16 մայիսի — Sputnik. Սուրենավան համայնքի 4 կայանքից 3-ը գործել են անխափան, իսկ մեկը գազի բացակայության պատճառով չի գործել, ինչի հետևանքով էլ գյուղը ենթարկվել է կարկտահարության։
ՀՀ ԱԻՆ Հիդրոմետ ծառայության Արարատի հակակարկտային կայանն այսպես է պարզաբանում Սուրենավան համայնքում տեղացած կարկտի մասին մամուլում շրջանառվող լուրերը և դրանց պատճառները:
Ս/թ մայիսի 14-ին, ժամը 18:27-ից 19:22-ը` ՀՀ Արարատի մարզի Երասխ, Արմաշ, Սուրենավան, Արարատ, Նորակերտ, Ավշար, Այգեվան, Ոսկետափ համայնքների տարածքներում տեղակայված 27 գազագեներատորային հակակարկտային կայանքների միջոցով ներգործության է ենթարկվել երկրորդ կարգի մեկ ամպ, իրականացվել է 6188 կրակոց:
Վերոնշյալ ամպից կարկտահարության դեպք է արձանագրվել Սուրենավան համայնքում, որտեղ տեղակայված են ՀՀ ԱԻՆ Հիդրոմետ ծառայությանը պատկանող 4 գազագեներատորային հակակարկտային կայանք: Նշված 4 կայանքից 3-ը գործել են անխափան, իսկ մեկը չի գործել` կայանքում գազի բացակայության պատճառով:
ՀՀ ԱԻՆ Հիդրոմետ ծառայության և համայնքների միջև կնքվող համագործակցության պայմանագրերում համայնքների պարտականությունների շրջանակներում ներառված են գազագլանանոթների լիցքավորման ծախսերի վճարումները, սակայն վերոնշյալ կայանքի գազագլանանոթները չեն լիցքավորվել համայնքի կողմից:
Դեռևս մի քանի օր առաջ Սուրենավան համայնքում առկա բոլոր 4 հակակարկտային կայանքների գազագլանանոթները լիցքավորված չեն եղել:
Հաշվի առնելով այն հանգամանքը, որ նշված համայնքը ծիրանի մշակման գլխավոր շրջաններից մեկն է, ինչպես նաև համայնքի բնակիչների խնդրանքը, Արարատի հակակարկտային կայանը՝ ի դեմս կայանի պետի, բանակցություններ է վարել գազ մատակարարող կազմակերպության հետ, ինչի արդյունքում առկա 4 հակակարկտային կայանքներից 3-ի գազագլանանոթները վերալիցքավորվել են և կայանքները բերվել են աշխատանքային վիճակի:
Մայիսի 14-ին տեղի ունեցած կարկտահարության հետևանքով տուժել է համայնքի այն տարածքը, որը գտնվել է 4-րդ (չլիցքավորված) կայանքի ներազդեցության գոտում:
Ս/թ մայիսի 15-ին հերթական բանակցությունների արդյունքում՝ վերոնշյալ կայանքի գազագլանանոթները լիցքավորվել են և բոլոր 4 կայանքները գտնվել են աշխատանքային վիճակում՝ կատարելով ակտիվ նմերգործման աշխատանքներ։
Հարկ է նշել նաև, որ մինչ օրս Սուրենավանի համայնքապետարանը գազ լիցքավորող կազմակերպությանը չի փոխանցել լիցքավորված գազագլանանոթների գումարը:
