ԵՐԵՎԱՆ, 24 մարտի — Sputnik. Աշխարհի չեմպիոնի հավակնորդների մրցաշարին մասնակցող Լևոն Արոնյանը շարունակում է անհաջող ելույթ ունենալ:
Ինչպես տեղեկացնում է 2700chess.com-ը, հայ գրոսմայստերը կորցրել է 21.2 վարկանիշային միավոր: Այժմ Արոնյանն ունի 2772.8 միավոր և նահանջել է 11-րդ տեղ՝ զիջելով միանգամից 6 աստիճանով:
Հայ գրոսմայստեր Լևոն Արոնյանը նախօրին սպիտակներով մրցեց Ռուսաստանը ներկայացնող Սերգեյ Կարյակինի հետ և պարտվեց 74-րդ քայլում:
Հիշեցնենք, որ բեռլինյան մրցաշարին մասնակցում են շախմատի աշխարհի գավաթի խաղարկության հաղթող Լևոն Արոնյանը (Հայաստան), գավաթի խաղարկության եզրափակչի մասնակից Դին Լիրենը (Չինաստան), ՖԻԴԵ-ի «Գրան Պրի»-ի ընդհանուր հաշվարկում առաջին և երկրորդ հորիզոնականները զբաղեցրած շախմատիստներ Շահրիար Մամեդյարովը (Ադրբեջան) և Ալեքսանդր Գրիշչուկը (Ռուսաստան), 2017թ. ընթացքում ամենաբարձր միջին գործակից ունեցող երկու շախմատիստներ` Ֆաբիանո Կարուանան (ԱՄՆ) և Ուեսլի Սոն (ԱՄՆ), աշխարհի փոխչեմպիոն Սերգեյ Կարյակինը (Ռուսաստան) և աշխարհի 14-րդ չեմպիոն Վլադիմիր Կրամնիկը (Ռուսաստան):
Մրցաշարում հաղթող շախմատիստն աշխարհի չեմպիոն Մագնուս Կառլսենի հետ մրցելու իրավունք կստանա: