ԵՐԵՎԱՆ, 17 փետրվարի — Sputnik. Երևանյան տպավորությունների մասին այս անգամ պատմել է ռուսական myJane ամսագիրը։ Պարբերականը գրել է, որ «այդ աղմկոտ ու ժամանակակից քաղաքում զգացվում է պատմության շունչը»։
«Երևանը նախագծվել է որպես Արարատին նայող քաղաք։ Բիբլիական լեռը երևում է քաղաքի գրեթե ցանկացած կետից։ Հյուրերին տպավորում է թռչող ափսե հիշեցնող «Զվարթնոց» օդանավակայանը։ Քաղաք մտնելիս ձախի վրա կարող եք տեսնել Երևանի կոնյակի գործարանը։ Մուգ նարնջագույն տուֆից կառուցված այս շենքի գույնը հենց կոնյակ է հիշեցնում։ Հետո երևում է Հրազդան գետի վրայով անցնող կամուրջն ու Սուրբ Սարգիս եկեղեցին», —նշված է հոդվածում։
Հեղինակին հիացրել է նաև Երևանի վարդագույն տուֆը` քարերի սիմֆոնիան, որի հեղինակը ճարտարապետ Ալեքսանդր Թամանյանն է։ Նրանց կարծիքով` քաղաքին յուրահատուկ տեսք են հաղորդում նաև բազմահարկ շենքերը։
Երևանը ինը շրջան ունի, որոնք իրենց կոմպոզիցիոն ու ճարտարապետական լուծումներն ունեն։ Նորքի ու Քանաքեռի լանջերն ուղղված են Արարատյան դաշտին ու յուրօրինակ ամֆիթատրոն են ստեղծում, որի կենտրոնը Հանրապետության հրապարակն է։
«Հայաստանի կենտրոնում երգող շատրվաններ կան, իսկ գեղեցիկ խճանկարային գորգի տակ 3000 տարվա փլատակներ են։ Հրապարակը երևանցիների ու մայրաքաղաքի հյուրերի սիրելի հանգստավայրն է», — հրապարակման մեջ նշում է Յուրի Սուպրունենկոն։
Հեղինակը հատուկ ընդգծում է Ա. Սպենդիարյանի անվան օպերայի և բալետի ազգային ակադեմիական թատրոնի շենքի գեղեցկությունը։
Մեծ պահանջարկ է վայելում ազգային պատկերասրահի հարևանությամբ գտնվող Հայաստանի պատմության թանգարանը, որտեղ կա հնագիտական և ազգագրական ազգային ժառանգության ավելի քան 400 հազար ցուցանմուշ։ Ազգային պատկերասրահը հայ կերպարվեստի խոշորագույն հավաքածուն է աշխարհում ։
«Մեծ հետաքրքրություն է առաջացնում Սերգեյ Փարաջանովի թանգարանը։ Նրա «Մոռացված նախնիների ստվերներն» ու «Նռան գույնը» ոգեշնչել են կինոյի վարպետներին, որոնց թվում են Ֆելինին ու Տարկովսկին», — նշում է պարբերականը։
Գոյության մեկ քառորդ դարի ընթացքում թանգարանը կազմակերպել է բազմաթիվ ցուցահանդեսներ, այդ թվում` արտասահմանում։ Ամեն տարի հունվարի 9-ին թանգարանում խնջույք են կազմակերպում, ինչպես Փարաջանովի կյանքի օրոք։ Սեղանի շուրջ են հավաքվում կյանքից հեռացած նկարչի տաղանդի երկրպագուները։
