ԵՐԵՎԱՆ, 8 հունվարի — Sputnik. Կալիֆոռնիայի Los Angeles Times պարբերականը հրապարակել է 2017 թվականին հայերով բնակեցված Գլենդել թաղամասում վաճառված 5 ամենաթանկ անշարժ գույքից կազմված ցանկը։ Տարվա ընթացքում այնտեղ 2 մլն և ավելի դոլար արժողությամբ 15 տուն է վաճառվել։ 2016 թվականին դրանք ընդամենը 10–ն էին։
Այնուամենայնիվ, լավագույն հնգյակը համալրեցին 3 մլն դոլարից ավել արժողությամբ տները։
Վաճառված տներից ամենաթանկը Եղնիկների կածանում գտնվող շքեղ ամառանոցն էր։ Հսկայական տունը, որը 6000 քառակուսի ֆուտ մակերես ունի (500 քմ) և կառուցված է ամերիկյան միջնադարի ոճով (Վայրի արևմուտք), վաճառվել է 4.3 մլն դոլարով։ Տունը կառուցել էին 2013 թվականին։
Երկրորդ տեղում է օսկարակիր և «Ոսկե գլոբուսի» մրցանակակիր, կոմպոզիտոր Մայքլ Դանայի նոր տունը. սեպտեմբերին երաժիշտը ձեռք էր բերել Կորտեզ Դրայվում գտնվող 3.78 մլն արժողությամբ առանձնատունը։ Շուրջ 600 քմ բնակելի տարածք ունեցող տան ճարտարապետությունն արված է իտալական Վերածննդի ոճով` զարդարված իսպանական բարոկոյի տարրերով։ Տան հետևի բակում պիցայի պատրաստման համար նախատեսված վառարան կա։
Գլենդելի երրորդ ամենաթանկ տունը Գրանդ ավենյուի վրա գտնվող տունն էր, որը հայտնի է «Խաղաղ ամրոց» անվանումով։ Այդ շինությունն արված է XVIII դարի անգլիական ոճով, ունի լողավազան, թենիսի կորտ և խոհանոց, որը գտնվում է ողջ համալիրի ամենակենտրոնում։ Այն վաճառել են մարտին, 3.325 մլն–ով։
Նախավերջին հորիզոնականում է հարմարավետ, հսկայական Պրինցես Դրայվի վրա գտնվող փառահեղ տունը։ Այն հսկայական տարածություն է զբաղեցնում, և ունի 6 ննջասենյակ, որոնք գտնվում են առաջին հարկում, և երեք ննջասենյակ` նախատեսված հյուրերի համար։ Բոլոր այդ ննջասենյակներից գեղեցիկ տեսարան է բացվում դեպի լեռներ։ Այս առանձնատան համար դեկտեմբերին վճարել են 3.2 մլն նախատոնական դոլարներ։
LA Times–ի ցուցակի «ամենաէժան» տունը Իսթ Շևի Չեյզի վրա գտնվող առանձնատունն էր։ Այն որևէ «առանձնահատուկ» բան չունի. բուխարի, շեֆ խոհարարի համար նախատեսված խոհանոց, չորս լյուքս դասի գրասենյակներ, բար, պարսպապատ պատշգամբ, շոգեբաղնիք և երկու հոգու համար նախատեսված զուգարան։ Այս ամենը տեղակայված է 600-մետրանոց բնակելի տան տարածքում և վաճառվել է 3.05 մլն դոլարով։
