ԵՐԵՎԱՆ, 29 դեկտեմբերի — Sputnik. Հայաստանում դեկտեմբերի 29-ին և 30-ին օդի ջերմաստիճանը կշարունակի բարձրանալ Իրաքի տարածքից ներթափանցող տաք օդային հոսանքների հաշվին, այսօր լրագրողներին ասաց ՀՀ ԱԻՆ «Հիդրոմետ» ծառայության օդերևութաբանության կենտրոնի պետ Գագիկ Սուրենյանը։
Նրա խոսքով` մինչև դեկտեմբերի 31-ը Հայաստանում առանց տեղումների եղանակ կլինի։
«Հունվարի 1-ից Միջերկրական ծովից Հայաստան է շարժվում ցիկլոն, որն իր հետ կբերի տեղումներ։ Հունվարի 1-2-ին անձրևոտ կլինի», — ասաց օդերևութաբանը։
Սուրենյանը նշեց, որ Սյունիքի հովիտներում (Մեղրի, Ագարակ և հարակից շրջաններ) ջերմաստիճանը կհասնի +23 աստիճանի, Տավուշի հովտային գոտիներում մինչև +20 աստիճանի, Արարատյան դաշտում և մայրաքաղաքում 12-14 աստիճան տաքության։
Այս ժամանակաշրջանում սպասվում է ամպամած եղանակ, գիշերային ժամերին կանխատեսվում է 4-5 աստիճան տաքություն, իսկ ցերեկը` 12-14։
«Մինչև հունվարի 10-ը ցուրտ օդային հոսանքների ներթափանցում չի կանխատեսվում: Միջին ամսական ջերմաստիճանը նորմայից դրական շեղված կլինի 3-4 աստիճանով»,- ավելացրեց Սուրենյանը։
Հայաստանի ամբողջ տարածքում, ինչպես նաև ծովի մակարդակից 2400 մետր ցածր գտնվող շրջաններում ձյան ծածկույթը բացակայում է։
«Սա նույնպես աննախադեպ երևույթ է, որ, օրինակ, Աշոցքում և Ապարանում տարվա այս շրջանում ձյուն չլինի», — ասաց Սուրենյանը։
«Հայհիդրոմետի» տվյալներով` կլիմայի տեսանկյունից 2017թ-ն անոմալ էր։ Հունվարին, փետրվարին և մարտին օդի ջերմաստիճանը նորմայից ցածր է եղել։ Հունիսին, հուլիսին և օգոստոսին անոմալ շոգ է եղել, բոլոր մարզերում արձանագրվել է բարձր ջերմաստիճան։ Արարատի մարզում օդի ջերմաստիճանը հասել է 42.6 աստիճան տաքության։
Անոմալիաները շարունակվում են, և հիմա շատ տաք դեկտեմբեր է։
Սուրենյանը հավելեց, որ նորմայի սահմանում են եղել միայն ապրիլը, մայիսը, հոկտեմբերը և նոյեմբերը։ Տարվա մյուս ամիսներն աչքի են ընկել կլիմայական նորմայից 5-7 աստիճան շեղումով։
Միաժամանակ նա նշեց, որ ամբողջ աշխարհում նկատվում են եղանակային անոմալիաներ։ Օրինակ` Հյուսիսային Ամերիկայում և Կանադայում վերջին 10 օրերին սարսափելի ցրտեր են. օդի ջերմաստիճանը որոշ շրջաններում հասել է —45-ից —50 աստիճանի, ինչը 15-20 աստիճանով ցածր է նորմայից։ Սուրենյանի խոսքով` երկրագնդի վրա եղանակը բաժանվել է երկու մասի` մեկում անոմալ տաք է, մյուսում` անոմալ ցուրտ։
Նա նաև նշեց, որ չնայած ժողովրդի շրջանում տարածված կարծիքին, թե տաք եղանակը կապված է նաև երկրաշարժի հնարավորության հետ, այդուհանդերձ այդ պնդումը գիտական ապացույցներ չունի։
