ԵՐԵՎԱՆ, 28 դեկտեմբերի — Sputnik. ՀՀ ազգային անվտանգության ծառայությունում ավարտվել է Գյումրու ռուսական ռազմակայանի զինծառայողի սպանության գործով նախաքննությունը։
Գործն ուղարկվել է դատարան և առաջիկայում կքննվի Շիրակի մարզի ընդհանուր իրավասության դատարանում։
Մինչ այդ դատական տեղեկատվական համակարգում որոշ տեղեկություններ են հրապարակվել Քրեական գործի վերաբերյալ։
Արման Ջանջուղազյանը, որ մեղադրվում է սպանության համար, ըստ գործի նյութերի, կապ է ունեցել «Իսլամական պետություն» ահաբեկչական խմբավորման համակիր ներկայացած, քննությամբ այս պահին դեռևս չպարզված անձանց հետ։ Նրանց օժանդակությամբ էլ 2017թ. ապրիլի 22-ին, ժամը 17:30-ի սահմաններում սպանել է ռուս զինվորին։
Ըստ գործի նյութերի` Ջանջուղազյանը սպանությունն իրականացրել է «կրոնական մոլեռանդության շարժառիթով» և դիտավորությամբ։
Ջանջուղազյանը Գյումրու «Արգո» խանութի մոտ ապրիլի 22-ին իր մոտ պահվող դանակով մի քանի հարված է հասցրել 102 ռազմակայանի զինծառայող, 1996թ․ ծնված Դմիտրի Յալպաևի պարանոցին` սպանելով նրան:
Դեպքից հետո Քննչական կոմիտեն պաշտոնական հաղորդագրությամբ հանդես եկավ և տեղեկացրեց, որ զինվորին պատճառվել է 8 վնասվածք, որոնց հետևանքով նա տեղում մահացել է:
Ի դեպ, դեպքից հետո հայտարարվեց, որ Արման Ջանջուղազյանը զինվորական ծառայության ընթացքում մի քանի անգամ ինքնավնասումներ է կատարել, ինչի հետևանքով, որպես հոգեկան խանգարումներ ունեցող, ազատվել էր ծառայությունից։:
Բացի այդ, նա զորամասում աթոռով հարվածել էր քնած ծառայակցին, ինչի առիթով ևս ներգրավվել էր քրեական գործում` որպես կասկածյալ։
