ԵՐԵՎԱՆ, 22 դեկտեմբերի — Sputnik. Վրաստանում Հայաստանի դեսպանների հարցում Հայաստանի որոշումներում հատուկ մոտեցում չկա։ Նման ընկալումներն էլ օբյեկտիվ չեն։ Այսօր, Sputnik Արմենիա մամուլի կենտրոնում, մեկնաբանելով Վրաստանի դեսպանի պշատոնում ԱԺ նախկին պատգամավոր Ռուբեն Սադոյանի նշանակումը, ասաց ՀՀԿ փոխնախագահ Արմեն Աշոտյանը։
«Ես վստահ եմ, որ Ռուբեն Սադոյանը լինելու է էֆեկտիվ դեսպան»,– համոզմունք հայտնեց Աշոտյանը` հավելելով, որ հետևել է դեսպանի գործունեությանն ու կարող է փաստել, որ նա բոլոր ջանքերը գործադրում է մոբիլիզացնելու վիրահայ համայնքին և ճիշտ հարաբերություններ կառուցելու Վրաստանի իշխանությունների հետ։
«Եկեք ծառի մասին դատենք պտուղներով,- հորդորեց Աշոտյանը, –եթե մի երկրում դեսպան է նշանակվում նախկին պատգամավորը, դա չի նշանակում, որ այդ երկիրն ավելի նվազ կարևոր է, քան այն երկիրը, որտեղ դեսպան է նշանակվում նախկին արտգործնախարարը»։
Արմեն Աշոտյանը նաև հայտնեց, որ առաջիկայում նախանշվում է ՀՀ նախագահի այցը Վրաստան, և Հայաստանի դեսպանն այս հարցում ունի իր կարևոր առաքելությունը:
