ԵՐԵՎԱՆ, 19 դեկտեմբերի — Sputnik. Այսօր մի խումբ քաղաքացիներ փակել են Սևանա լճից դեպի հարավ` Սոթքի հանքավայր տանող ճանապարհը։ Քաղաքացիները դժգոհ են հանքի ու հարստացման ֆաբրիկայի աշխատանքից։
Գեղարքունիքի մարզպետարանի աշխատակազմի ղեկավարը Sputnik Արմենիային ասաց` այնտեղ արդեն մեկնել է մարզպետի տեղակալը, որը պատրաստ է հանդիպել և՛ բողոքողների, և՛ հանքի վարչության` «ԳեոՊրոՄայնինգ Գոլդ» ընկերության աշխատակիցների հետ։
Հիմնարկությունում Sputnik Արմենիայի թղթակցին հայտնեցին, որ բողոքողները նրանց մոտ չեն աշխատում ու չեն էլ աշխատել։
«Այդ մարդիկ անընդհատ հանքավայր են ներխուժում ու հանքաքար գողանում (տեղացիները նրանց «չղջիկ» են անվանել)։ Ընկերության անվտանգության ծառայությունը լուրջ աշխատանքներ է տանում` նրանց փորած գետնանցքների ոչնչացման ու ապօրինի ներխուժումների կանխման ուղղությամբ։
Սա է, հավանաբար, նրանց դժգոհության պատճառը։ Աշխատանքի տեղավորման հետ այն կապ չունի։ Հակառակը` մենք 135 նոր աշխատատեղ ենք բացում ու արդեն վաղուց հայտարարել ենք դրա մասին տեղական ԶԼՄ–երում։ Մենք պատրաստ ենք աշխատատեղեր տրամադրել բոլոր ցանկացողներին ու նույնիսկ «չղջիկներին», եթե նրանք համապատասխան որակավորում ունեն», – հայտնեց «ԳեոՊրոՄայնինգ Գոլդ» ընկերության մամուլի հարցերով պատասխանատու Ռուզաննա Գրիգորյանը։
Եթե տվյալ քաղաքացիները փորձեն ընդհատել հանքի աշխատանքը, ընկերությունը ստիպված կլինի դիմել իրավապահ մարմինների օգնությանը, հավելեց նա։
