ԵՐԵՎԱՆ, 5 դեկտեմբերի — Sputnik. ԵԱՏՄ Մաքսային օրենսգրքի առկայության դեպքում տնտեսվարողներն ավելի արագ կկարողանա հատել սահմանը։ Այդ մասին ԱԺ-ում երեքշաբթի ասաց Հայաստանի կառավարությանն առընթեր պետական եկամուտների կոմիտեի նախագահի տեղակալ Վախթանգ Միրումյանը։
Միասնական օրենսգիրքը պետք է ուժի մեջ մտնի 2018 թվականից, սակայն ապրանքներից ստացվող տուրքերին այն չի վերաբերում (դրանք առանձին որոշումներով են ընդունում «Միասնական մաքսային սակագին» անվան տակ)։ Օրենսգիրքը տեխնիկական հարցեր է կարգավորում` բեռների հայտարարագրում, տեսչական ստուգումներ և այլն։
Այժմ մաքսատունը ապրանքների հայտարարագրումն ավելի արագ կիրականացնի. երկու ժամվա փոխարեն` մեկ ժամում։ Ավելին, մաքսային ծառայության աշխատակիցները հայտարարագրերում առկա սխալներ հայտնաբերելու դեպքում չպետք է այն անմիջապես սխալ համարեն։ Սխալները կնշվեն, և մեկ ժամ կտրվի դրանք ուղղելու համար։
Եվս մի կարևոր նորամուծություն` բեռները հնարավոր կլինի հայտարարագրել նաև առանց ապրանքագրերի։ Երբ հայտարարագիրը ստուգեն, ներկրողին ցույց կտան մաքսազերծման համար նախատեսված երեք միջանցքներից մեկը։ Եթե միջանցքը «կանաչ է», կարելի է անցնել առանց ապրանքագրերի։ Եվ միայն այն դեպքում, երբ միջանցքը «դեղին» կամ «կարմիր» կլինի, ստիպված կլինեն ցույց տալ փաստաթղթերը։
Բացի այդ, նույն ապրանքները հնարավոր կլինի ներկրել պարզեցված կարգով։ Նման հնարավորություն է տրվելու, երբ տնտեսվարողները ներկրեն նույն ապրանքի մի քանի խմբաքանակ։
Տնտեսվարողների համար կհեշտացնեն ներմուծումը նաև գիշերային ժամերին, երբ բանկերը չեն աշխատում։ Հնարավոր կլինի նախապես վճարել` կանխավճարի տեսքով։ Այդ դեպքում հարկ չի լինի մինչև առավոտ սպասել բանկերի բացվելուն։
Մաքսային տուրքերի վճարումները հնարավոր կլինի երկարաձգել մեկ ամսով։ Այդ դեպքում պետք կլինի լրացուցիչ տոկոս վճարել ԿԲ-ի վերաֆինանսավորման դրույքաչափով (6,0%)` օրերի հաշվարկով (այսինքն մեկ օրով հետաձգելու համար 6 տոկոսը պետք է բաժանել 365-ի)։
