ԵՐԵՎԱՆ, 3 դեկտեմբերի — Sputnik. Վրաստանի վարչապետ Գեորգի Կվիրիկաշվիլին հայտարարել է, որ ցնցվել է Թբիլիսիի կենտրոնում տեղի ունեցած դանակահարության դեպքից, որի հետևանքով երկու մարդ մահացել է։ Այս մասին հայտնում է Sputnik Գրուզիան։
Դեպքը տեղի է ունեցել ուրբաթ ցերեկը Թբիլիսիի №51 դպրոցի մոտակայքում։ Դանակահարության հետևանքով ծանր վնասվածքներ են ստացել 16 տարեկան երկու դպրոցական։ Նրանցից մեկը մահացել է հիվանդանոցի ճանապարհին, երկրորդը՝ մեկ օր անց վերակենդանացման բաժանմունքում։ Սպանության մեջ մեղադրվող անձանցից մեկը ձերբակալված է։
«Ես չափազանց ցնցված եմ երեկ տեղի ունեցած սարսափելի ողբերգությունից, որը երկու պատանու կյանք է խլել։ Ցավակցում եմ նրանց ընտանիքներին, մտերիմներին ու ընկերներին։ Սա ընդհանուր ողբերգություն է, որը ցնցել է բոլորիս ու ստիպել մտածել՝ ինչպես ենք թույլ տվել, որ մեր երիտասարդներն այդքան դաժանաբար ու անգթորեն զոհաբերեն միմյանց», — ասվում է Կվիրիկաշվիլիի` Ֆեյսբուքում հրապարակված հաղորդագրության մեջ։
Վարչապետը կոչ է արել միավորվել՝ նման ողբերգությունից խուսափելու համար։
«Մենք բոլորս պետք է միավորվենք, որպեսզի խաղաղ ու առողջ մթնոլորտը երաշխավորված լինի բոլորիս ու, նախևառաջ, մեր ապագա սերնդի համար։ Մենք պետք է միավորվենք կրթության ու գիտության նախարարության շուրջ, որպեսզի հստակ հասկանանք խնդիրը և լուծման ճանապարհներ մշակենք։ Այս ծանր պահին ուզում եմ հուսալ, որ միահամուռ ուժերով մենք կանենք ամեն բան, որպեսզի նման ողբերգություն այլևս չկրկնվի», — նշել է Կվիրակիշվիլին։
Երկուշաբթի օրվանից Վրաստանի դպրոցներում կխստացնեն անվտանգության միջոցները։ Բացի այդ, 51-րդ դպրոցի աշակերտների հետ հոգեբաններ կաշխատեն։
Քրեական գործ է հարուցվել «կանխամտածված սպանություն՝ ծանրացուցիչ հանգամանքներով» հոդվածով, որը 11-ից 20 տարի կամ անժամկետ ազատազրկում պատիժ է սահմանում։
